QR Básekelestikti qorǵaý jáne damytý agenttiginiń tóraǵasy Serik Jumanǵarin Qazaqstanda qurylys materialdarynyń qymbattaý sebepterin túsindirdi, dep habarlaidy QazAqparat.
«Agenttik júrgizgen baǵa monitoringine sáikes, zaýyttan tutynýshyǵa deiingi tsement qunynyń ósýi 25%-dy kórsetken. Aldyn ala aqparat boiynsha, baǵanyń negizgi ósýi kóterme-bólshek bóliminde baiqalady. Birqatar iri óndirýshi tsement satýdy tek ózderiniń saýda jáne satý kompaniialary arqyly júrgizedi. Qazaqstan temirjol aqparaty boiynsha, mamyr aiynda ótken jylmen salystyrǵanda tsement tasymaldaý kólemi 14%-dan astam (900 myń tonna) ósken. Bul rette magistraldyq temirjol jelisi tarifiniń ulǵaiýy tsement baǵasynyń ósýi 5%-dan aspaitynyna áser etti. Tsement baǵasynyń naqty ósýiniń sebepteri baiqalyp otyrǵan joq, Sondyqtan, baǵanyń ósýine bailanysty basty nazar kóterme-bólshek saýdaǵa aýdarylady», - dedi S. Jumanǵarin búgingi Úkimet otyrysynda.
Onyń aitýynsha, Qazaqstan ózin tsementpen 100% qamtamasyz etedi, tsementtiń 20%-dan astamy eksporttalady.
«Kirpish naryǵynda respýblika boiynsha 88 negizgi óndirýshi bar. Jergilikti naryqtarda, oblystardyń shekaralarynda birqatar qatysýshylardyń basymdyǵy oryn alýda. Sonymen birge, ishki naryqtyń 50%-y keramikalyq kirpishti importtaý arqyly qamtylady, al biz ózimizdi silikat kirpishpen qamtamasyz etemiz. Importtyń joǵary úlesin eskere otyryp, keramikalyq kirpishke baǵanyń eń joǵary ósýi baiqalyp otyr (30%), degenmen Resei Federatsiiasynda keramikalyq kirpishtiń qymbattaýy 5-10% kórsetken», - deidi spiker.
Respýblika boiynsha armatýra naryǵynda 5 óndirýshi jumys isteidi, olardyń negizgileri – óndiris qýaty 400 myń tonna Qaraǵandydaǵy «ArselorMittal Temirtaý» AQ jáne Qostanaidaǵy «EvrazKaspian Stal» JShS (450 myń tonna). Sonymen qatar, import 65% bolǵandyqtan, naryq importqa táýeldi. Armatýranyń álemdik baǵasy 70%-dan joǵary bolyp otyr.
«Sondai-aq, polietilen qubyrlaryna baǵanyń ósýi baiqalady. Qazaqstan boiynsha ortasha ósim – 10%, onyń ishinde Aqmola oblysynda – 62%, Shymkent qalasynda jáne Aqtóbe oblysynda – 19%, Qaraǵandy oblysynda-14% . Bul rette, Aqmola oblysynda «Qazinjiniring» AQ enshiles kásiporny «Tynys» AQ baǵany 62%-ǵa kótergen, al shikizat baǵasy 10%-dan aspaǵan. Atalǵan fakti boiynsha monopoliiaǵa qarsy zańnamany buzýshylyqtardy joiý týraly habarlama shyǵaryldy.
Polietilen qubyrlaryn óndirýge arnalǵan shikizat tolyǵymen importtalǵanyn atap ótken jón (RF). Sonymen qatar, Resei Federatsiiasynda polietilen shikizati baǵasy 10-15% qymbattaǵan», - dep túsindirdi S. Jumanǵarin.
«Osylaisha biz eń aldymen, qurylys materialdary baǵasynyń alypsatarlyq ósýin kórip otyrmyz. Osyǵan bailanysty agenttik baǵalyq ýaǵdalasýdyń anyqtalǵan belgileri boiynsha áreket etý sharalaryn qabyldaidy», - dedi agenttik tóraǵasy.
