Senator Aqylbek Kúrishbaev óziniń depýtattyq saýalynda Úkimettiń aýyl problemalaryn sheshý jónindegi jumysyn synǵa alyp, aýyldyń ózekti problemalaryna Premer-Ministrdiń nazaryn aýdardy, dep habarlaidy QazAqparat.
Onyń aitýynsha, qazir elimizde aýyl turǵyndary áleýmettik eń nashar jaǵdaida qalyp otyr. Onyń ústine, olardyń kópshiligi statistikanyń salystyrmaly túrde jaqsy kórsetkishterine qaramastan «shyn máninde tirshilik etýge» májbúr.
«Statistika derekteri boiynsha aýyldaǵy jumyssyzdar sany - 181 myń adam nemese 4,7 paiyz. Biraq, is júzinde jumyssyzdyq halyqtyń baǵyn ashpas sory boldy. Biz elimizdiń barlyq aýdandarynda aýyl turǵyndary arasynda arnaiy áleýmettik saýalnama júrgizdik. Olardyń basym kópshiligi jumystyń joqtyǵyn «basty másele» dep atady. Osy saýalnamada kórsetkendei, aýyl turǵyndarynyń naqty tabysy aiyna 35 myń teńgeni quraidy. Mundai aqshaǵa qalai kún kórýge bolady?», – dedi Aqylbek Kúrishbaev Senattyń jalpy otyrysynda.
Senator jumyssyzdyq saldary taǵy bir problemany týǵyzyp otyrǵanyn aityp, búginde aýyl halqynyń qalalarǵa ketý dinamikasynyń artyp otyrǵanyn tilge tiek etti.
«Biz júrgizgen áleýmettik saýalnama nátijeleri kórsetkendei, eńbekke qabiletti halyqtyń 41 paiyzy aýyldardan qalaǵa kóshýdi qalaidy. Árine, ýrbanizatsiianyń álemdik úrdis ekeni túsinikti, biraq ony basqarý kerek qoi. Jaqyn mańdaǵy aýyldardan bir sátte halyqtyń jappai kóshi-qony bastalsa, bizdiń qalalarymyzda ne bolmaq? Eger aýyl sharýashylyǵynda jumys isteitin eshkim qalmasa, eldiń azyq-túlik qaýipsizdigin qalai qamtamasyz etemiz? Shekaralas aýdandar qalai qorǵalmaq?», – dedi ol.
Depýtat bul másele elimiz úshin tek ekonomikalyq qana emes, sonymen qatar saiasi jáne strategiialyq mańyzǵa ie ekenin atap ótti. Sondyqtan Aqylbek Kúrishbaev Úkimettiń aýyldardy damytýǵa nege tiisti kóńil bólmegenine jáne senatorlardyń Parlamenttik tyńdaýda bergen usynystarynyń negizgi tarmaqtaryn áli de oryndamaǵanyna nazar aýdardy. Sonymen qatar qazaqstandyq aýyldy damytýǵa iri aýyl sharýashylyǵy kompaniialary belsendi úles qosýy tiis ekenin aitty.
