Úndistan astanasy Niý-Delide kúres túrlerinen bir aptaǵa sozylǵan Aziia birinshiligi aiaqtaldy, dep habarlaidy "Ult aqparat".
Atalǵan qurlyqtyq dodadan kúrestiń úsh túrinen (grek-rim, erkin jáne áielder kúresi) Qazaqstan quramasy 19 medal (5 altyn, 2 kúmis, 12 qola) jeńip aldy.
Áýeli jarysty grek-rim kúresiniń sheberleri bastaǵan bolatyn. Baqtiiar Baiseiitov úmit artyp, aparǵan 10 balýannyń beseýi júldeger atanyp, jalpykomandalyq esepte úshinshi orynǵa turaqtady.
Atap aitsaq, «klassikterden» Tamerlan Shadýkaev (77 keli) el qorjynyna alǵashqy altyndy salsa, Ibragim Magomadov (72 keli) alǵashqy kúmis júldeni syilady. Al Horlan Jaqansha (55 keli), Azamat Kústibaev (87 keli) jáne Mansur Shadýkaevtar (130 keli) el qorjynyn qola medaldarmen tolyqtyrdy.
Grek-rim jarysy aiaqtalǵannan keiin, bozkilemge áielder kúresiniń sheberleri shyqqan bolatyn. Nurlan Amanqosov baptaityn burymdy balýandar bul joly bapkeriniń senimin tolyǵymen aqtady. Olai deitinimiz, áielder kúresinen Qazaqstan quramasy araǵa alty jyl salyp Aziia birinshiliginen bir emes, eki birdei altyn medal jeńip aldy.
Aitalyq, 53 keli salmaqta Tatiana Amanjol alty jyldan keiingi alǵashqy altyn medaldi ielense, Jámila Baqbergenova (72 keli) da qarsylas shaq keltirmei ekinshi altyndy el qorjynyna saldy. Sonymen qatar, Aiaýlym Qasymova (62 keli) finalǵa deiin jetip, kúmis medal iegeri atandy. Al Valentina Islamova (50 keli), Marina Zýeva (55 keli), Aiaýlym Qasymova (57 keli), Mádina Baqbergenova (59 keli), Elmira Syzdyqova (76 keli) bastaǵan balýandarymyz úzdik úshtikten kórinip, qola medal iegerleri atandy.
Osylaisha, balýan qyzdarymyz 2 altyn, 1 kúmis, 5 qola medal jeńip aldy.
«Saryqurlyq» dodasyn sońǵy bolyp erkin kúres sheberleri túiindedi. Áset Serikbaev baptaityn erkin kúres sheberleri de el úmitin aqtai bildi. Olar da el qorjynyna eki altyn, tórt qola júldeni saldy.
Naqtyraq aita ketsek, erkin kúresten 74 keli salmaqta el namysyn qorǵaǵan Daniiar Qaisanov Aziia chempiony atandy. Ol osy jeńisinen keiin «eki dúrkin Aziia chempiony» degen atqqa qol jetkizdi. Ol ótken jyly qytaida ótken Aziia chempionatynda da bas júldeni jeńip alǵan bolatyn. Ekinshi altyndy Iýsýp Batyrmýrzaev (125 keli) el qorjynyna saldy.
Sondai-aq, Dáýlet Niiazbekov (65 keli), Meiirjan Ashirov (70 kg), Ilishan Chilaev (92 keli) pen Álisher Erǵali (97 keli) qol medal iegerleri atandy.
Osylaisha Úndistan astanasy Niý-Delide kúres túrlerinen ótken Aziia birinshiliginde Qazaqstan quramasy jalpy 19 medal (5 altyn, 2 kúmis, 12 qola) jeńip aldy.
