Qazaqstanda alǵash ret olimpiadalyq kúres túrlerinen ótken álem chempionaty óz máresine jetti, dep habarlaidy QazAqparat.
Naqtyraq aitsaq, 14-22 qyrkúiek aralyǵynda Qazaqstan astanasynda grek-rim, erkin jáne áielder kúresinen Tokio Olimpiadasyna joldama beretin álem chempionaty ótti. Bairaqty básekede álemniń 100 elinen 1 002 balýan kúsh synady. Ár kúres túrinen 10 salmaqtan jalpy 30 medal jiyntyǵy sarapqa salyndy. Sondai-aq, kelesi jyly alaýy tutanatyn Tokio Olimpiadasyna ár salmaqtan 6 balýanǵa joldama úlestirildi.
Jalpy, kúres túrlerinen qazaqstandyq balýandar 7 medal (grek-rim kúresinen - 1 kúmis, 2 qola, áielder kúresinen - 1 qola, erkin kúresten - 2 kúmis, 1 qola) jeńip alsa, Olimpiada oiyndaryna jalpy 8 joldamaǵa ielik etti.
Álem birinshiligin alǵash bolyp grek-rim kúresiniń sheberleri bastaǵan bolatyn. Qazaqstandyq grek-rim kúresiniń balýandary álemdik dodany bir kúmis jáne eki qola medalmen aiaqtady.
Atap aitar bolsaq, Qorlan Jaqansha (55 keli) men Almat Kebispaevtyń (63 keli) jeńisti jolyn Meirambek Ainaǵulov jalǵastyrdy. 60 kelide beldesken Ainaǵulov kishi finalda ýkrainalyq Lenýr Temirovti 10:0 esebimen jeńip, óziniń júlde qorjynyn álem birinshiliginiń qola júldesimen tolyqtyrdy.
Sonymen Baqtiiar Baiseiitov baptaityn grek-rim kúresinen Qazaqstan komandasy óz elimizdegi dodany altynsyz aiaqtady. Chempionat bastalǵanǵa deiin kúres mamandary men balýandar elimizde ótetin álemdik synda ánuranymyzdy shyrqatamyz degen oilary iske aspai qaldy. Osylaisha, «klassikter» álem chempionatynan bir kúmis, eki qola jáne Olimpiadanyń eki joldamasymen qorytyndylady.
«Klassikterden» keiin áielder kúresine de kezek keldi. Alaida, balýan qyzdarymyz álem birinshiligin jalǵyz qola medalmen aiaqtady. 50 keli salmaqta el namysyn qorǵaǵan Valentina Islamova álem chempionatynda el qorjynyna jalǵyz qola medal saldy. Sondai-aq, Tokio Olimpiadasyna joldama jeńip aldy. Qyzdar kúresinen jalpy Olimpiadaǵa eki joldama buiyrdy. Ekinshi joldamany birinshilikte 5-orynǵa ie bolaǵan 76 keli salmaqtaǵy balýanymyz Elmira Syzdyqova da jeńip aldy.
Jalpy, Nur-Sultanda ótken álem birinshiliginde áielder kúresinen alǵashqy úshtikti Japoniia, Resei, AQSh quramalary túiindedi.
Al álem birinshiginde sońǵy bolyp, erkin kúres sheberleri beldesti. Álem chempionatynyń qorytyndysy boiynsha erkin kúresten Qazaqstan quramasy komandalyq esepte tuńǵysh ret júldeli ekinshi orynmen aiaqtady. Resei quramasy Nur-Sultandaǵy álem birinshiliginde 190 upaimen jalpy esepte kósh bastasa, 103 upaimen Qazaqstan quramasy ekinshi orynnan kórindi. Úzdik úshtikke 94 upai enshilegen AQSh balýandary ie boldy.
Ál erkin kúres balýandary álem chempionatanda eki kúmis, bir qola medal jeńip aldy. Sondai-aq, 57, 65, 74, 97 keli salmaqta Olimpiada oiyndaryna tórt joldamaǵa ielik etti.
Atap aitar bolsaq, Nurislam Sanaev (57 keli – qola), qyzylordalyq Dáýlet Niiazbekov (65 keli – kúmis) jáne petropavldyq Nurqoja Qaipanov (70 keli – kúmis) medalǵa ielik etti. Bul tizimge Álisher Erǵali (97 keli), Ǵalymjan Óserbaev (79 keli), Ádilet Daýlymbaev (86 keli) qosylar edi. Biraq úsheýi de qola júlde úshin tartysta utyldy.
Sonymen, kúres túrlerinen óz elimizde ótken álem birinshiligi taǵy da «altynsyz» aiaqtaldy. Biraq Qazaqstan balýandary Tokio Olimpiadasyna kúrestiń úsh túrinen jalpy 8 joldamaǵa ielik etti. Grek-rim kúresiniń balýandary - 2, áielder kúresiniń balýandary - 2 joldamaǵa ie bolsa, eń kóp joldamaǵa erkin kúres sheberleri qol jetkizdi. Olardyń enshisinde Olimpiada oiyndarynyń 4 joldamasy bar.
Olimpiadalyq kúres túrlerinen ótken álem chempionatynyń jalpy esebi:
Grek-rim kúresi:
1. Resei
2. Ózbekstan
3. Grýziia
Qazaqstan 5-orynda
Erkin kúres boiynsha:
1. Resei
2. Qazaqstan
3. AQSh
Áielder kúresi:
1. Japoniia
2. Resei
3. AQSh
Qazaqstan 6-orynda.
