«Sary», «jasyl» aimaqtaǵy óńirlerde arnaiy qurban shalatyn oryndar ashylady. Oǵan barý úshin aldyn ala jazylý kerek, dep habarlaidy QazAqparat.
«Ár óńirdegi QMDB jumys tobynyń call-ortalyqqa qońyraý shalyp, aldyn ala jazylý kerek. Arnaiy tizim jasalyp, qurban shalýǵa nietti tulǵaǵa kezek sany men baratyn naqty ýaqytyn habardar etýi qajet. Bári birdei bir ýaqytta barmaý úshin, árkim talon sekildi óz kezegimen baryp qurbandyq shalady», - dep túsindirdi QMDB tóraǵasynyń orynbasary, naib múfti Ershat Ońǵar Ortalyq kommýnikatsiialar qyzmetinde ótken baspasóz máslihatynda.
20 shilde kúni saǵat 7:20 dan bastap «sary», «jasyl» aimaqtaǵy óńirlerde aldyn ala jazylǵan tulǵalar belgilengen ýaqytta arnaiy qasaphanada qurban shalady, árbir adamǵa 1 saǵat ýaqyttan beriledi.
«Oflain formatta qurban shalýshy QMDB-nyń jaýapty tulǵasyna «ASHYQ» baǵdarlamasyndaǵy óz statýsyn kórsetýi qajet. «Jasyl» jáne «kók» tústerdegi tulǵalar qasaphana ǵimaratyna kire alady, «qyzyl» jáne «sary» tústerdegi tulǵalarǵa ruqsat etilmeidi», - deidi Ońǵar.
Qurbandyq etin et saqtaityn oryndarǵa jóneltý jáne jetkizýmen eriktiler, imamdar ainalysady. Bul tegin bolady. Qurban etterin jaǵdaiy tómen otbasylar, jetimder men qarttar úii jáne áleýmettik jaǵdaiy osal toptarǵa taratylady.
«Qaspahanalarda tazalyqqa mán berilip, sanitarlyq talaptardyń saqtalýyn qatań qadaǵalaýdy qolǵa aldyq. Kúni keshe Bas múfti jumys tobymen birge qasaphana tazalyǵyn, mal soiatyn oryndar men soiylatyn maldy kórip qaitty. Qurbandyq malyn soidyrýǵa, satyp alýǵa, satý, ony soiý kezinde sanitarlyq talaptar, tazalyq jaǵyna mán berýge shaqyramyz. Dinimizde tazalyqtyń mańyzy joǵary», - dedi Ershat Ońǵar.
