Eldegi karantinge bailanysty biyl musylman qaýymynyń Qurban ait meiramyn qarsy alý rásimine ózgerister engizildi. Basty talap - saqtyq sharalaryn buzbaý. Koronavirýs kezinde atalǵan merekeni qarsy alý men onyń ereje-talaptary týraly Qazaqstan musylmandary dini basqarmasy Dini bilim jáne kadr daiyndaý bóliminiń meńgerýshisi Smaiyl Seitbekov áńgimelep berdi, dep habarlaidy QazAqparat agenttigi.
«Álemdi jailaǵan koronavirýs indetin joiý maqsatynda árbir azamat aldymen saqtyq sharalaryn ustanǵan jón. Bul indet kóptegen josparlar men belgilengen sharalardyń sol siiaqty aitýly merekelerdiń atalyp ótilýine shek qoiyp otyr. Osyǵan bailanysty Qazaqstan musylmandary dini basqarmasy barsha qaýymnan óz qaýipsizdikteri úshin karantin erejelerin buzbaýǵa shaqyrady. Sonymen qatar halyqtan biylǵy Qurban ait meiramyn burynǵydai bazarǵa baryp mal alyp soiyp, qonaq shaqyryp, qonaqqa baryp aittaýdy toqtata turýyn ótinemiz», - dedi Smaiyl Seitbekov.
Onyń aitýynsha, atalǵan meiramdy ár pende óz otbasymen qarsy alyp, úide otyryp duǵa-tilek jasaǵany abzal.
«Azamattarymyz meshitke barmadyq, ait namazy oqylmady, burǵynǵydai qurbandyq shalmadyq dep qynjylmaýy tiis. Qurban aitty árbir pende úide otyryp namaz oqyp, duǵa jasap qarsy alýǵa da bolady. Biylǵy Qurban aitty qarsy alýdyń ereksheligi sol, meshitterde ait namazynyń oqylmaýy. Degenmen ár pende óz úiinde oqýyna bolady. Qaýipsizdik maqsatynda elimizdiń bas sanitar dárigeriniń talaby boiynsha qurbandyq shalýǵa ruqsat joq. Al aýyldyq jerde halyqtyń shoǵyrlanýy az jáne jer úi bolǵandyqtan qurbandyq shalýǵa kedergi joq. Qalalyq jerde qurbandyq shalýǵa tyiym salynǵan. Al nietti kisiler úshin bizdiń basqarma Qurban2020.kz saityn iske qosty», - deidi ol.
Basqarma ókiliniń málimdeýinshe, Qurban aitty qarsy alý sátinde árbir azamat qaýipsizdik qaǵidasyn qatań ustanyp, ortaq erejege baǵynǵany jón.
«Qurbandyq shalýǵa qatysty aityp ótetin taǵy bir másele bar. Qurbandyq iesi burynǵydai ettiń úshten bir bóligin ózine alyp kete almaidy. Sol úshin azamattardan túsinispeýshilikpen qaraýyn suraimyz. Óitkeni qurbandyqtyń úshten bir bóligin alýǵa adamdar kelse, kezekke turý bastalady, ondai jaǵdaida sanitarlyq shara saqtalmaidy degen sóz. Qurbandyqqa shalynǵan etke kelsek, bizde muqtaj jandardyń tizimi bar, sol kisilerge teńdei úlestiriledi», - dedi S. Seitbekov.
