Jýyrda qasietti Qurannyń jańa aýdarmasy men tápsiri jaryq kórdi. Osy oraida elordadaǵy QMDB ǵimaratynda atalǵan kitaptyń tanystyrylymy ótti, dep habarlaidy "Ult aqparat".
Arab tilinen aýdarǵan - islamtanýshy, QMDB naib múftii Ershat Ońǵarov. Qazaq tiliniń ádebi mánerimen órnektep, redaktsiialaǵan Qazaqstan Jazýshylar odaǵynyń múshesi, prozashy Nurjan Murataliev.
«Qasietti Quran: maǵynasy men túsiniktemeleri» atty eńbektiń tanystyrylymyna Bas múfti Naýryzbai qajy Taǵanuly, ziialy qaýym ókilderi men din qairatkerleri qatysty.
«Qazaqstan musylmandary dini basqarmasy biyl otyz jyldyǵyn atap ótýde. Bul rette kóptegen igi sharalar josparlanǵan. Búgingi sharanyń maqsaty - qasietti kitabymyz Qurandy elge qazaq tilinde, qazaqtyń saltyna sai túsindirip jetkizý. Qasietti Qurannyń aýdarmasy jáne onyń tápsiri jaryq kórip jatyr, Alla qalasa búgin qalyń oqyrmaǵa jol tartatyn bolady. Ziialy qaýym ókilderimen, din qairatkerlerimen birge tusaýkeserin ótkizip jatyrmyz», - dedi Bas múfti.
Osy oraida ol atalǵan eńbek jastardyń men jamaǵat úshin Qurannyń maǵynasy men tápsirin durys túsindirýge negizdelgenin atap ótti. Atap aitqanda, oqyrmanǵa jeńil túsindirý qarastyrylǵan.
«Jastardyń destrýktivti dini aǵymdardyń jetegine ketý faktorlarynyń biri – Qurannyń maǵynasy men tápsirin durys túsinbeý. Keide Quran aiattaryn tikelei maǵynasynda túsinip jatady. Aýdarma ereksheligi – qasietti aiattar arab tilindegi túpnusqadan aýdarylǵan, aiattardyń qazaqsha maǵynasy berilgen, aiattyń tápsiri, túsiniktemesi men tarihy jan-jaqty jazylǵan. Súreniń qazirgi ǵylymmen bailanysy baiandalǵan, arab tilindegi aiattyń durys oqylý transkriptsiiasy berilgen», - dedi Naýryzbai qajy Taǵanuly.
Kitap kólemi 1000 betten asady. Aýdarmashy aýdarma barysynda Mysyr, Túrkiia, Arab memleketterindegi túpnusqa qoljazbalarǵa súiene otyryp, din men dástúr sabaqtastyǵyna mán bergen.
«Aita keter jait, Ershat baýyrymyz ál-Matýridi, án-Násáfi, ál-Jáláláin, ál-Álýsi syndy hanafi mázhabynyń ǵulama-ǵalymdary men tápsirshilerdiń kitabynan óz nusqasynan aýdaryp shyqty. Bul eńbekke birneshe jylyn sarp etti. Alla saýaptan jazsyn!», - dedi Bas múfti.
Óz kezeginde Ershat Ońǵarov on jylǵa jýyq ýaqytyn atalǵan aýdarma eńbegine bólgenin atap ótti.
«Jastardy rýhani tárbiege jáne tereń tanym alýǵa qural bolady dep senemin. Búgingi 3 myń danamen shyǵyp otyrǵan nusqaǵa demeýshilik jasaǵan azamattarǵa alǵysymdy aitamyn», - dedi E. Ońǵarov.
