Aqtóbe rels-arqalyq zaýyty jylyna 600 myń tonna ónim shyǵarý múmkindigine ie. Jylyna 200 myń tonna rels, 230 myń tonna pishindi ilek shyǵaratyn zaýyt basshylary tapsyrys bolsa, ónim kólemin arttyrýǵa ýáde bergen. Al qazir bar bolǵany 100 myń tonna rels shyǵady. Tapsyrys berýshi Resei men Ózbekstannan ǵana tabyldy. Bul týraly Aqtóbe oblysy ákiminiń orynbasary Asqar Biahmetov 9 aidyń qorytyndysy kezinde aitty, dep habarlaidy "Ult aqparat" BNews.kz portalyna silteme jasap.
Aqtóbe oblysynda ekonomika, aýyl sharýashylyǵy salasynyń 9 ailyq qorytyndysy belgili boldy. Ádettegidei, ónerkásip, investitsiia, qurylys, tipti, saýda salasynda da qiyndyqtar bar. Óńirdiń ekonomikasyna jaýapty oblys ákimi Asqar Biahmetovtiń aitýynsha, munai da taýsyla bastaǵan. Iri munai komaniialary, atap aitar bolsaq, «SNPS-Aqtóbemunaigaz» AQ, «QazaqOil» seriktestigi uńǵymalardyń munai kólemi azaiǵanyn, qysymnyń túsip ketkenin alǵa tartyp otyr. Endigi jol – Energetika, Investitsiia jáne damý ministrimen aqyldasyp, kelisimdegi munai óndirý kólemin azaitýdy usyný. Sebebi, jyl ótken saiyn qara altyn óndirisi tómendep keledi.
«Reseidegi iri zaýyttyń ýaqytsha toqtaýyna bailanysty «Voshad Oriel» seriktestiginiń ónimine suranys azaidy. Endi jańa jol, jańa satyp alýshylardy izdeý qajet. Sonymen qatar, quramynda altyny bar kendi óndirý 76,6 myń tonnaǵa tómendedi. Qazir ken óńdeý fabrikasyn salý mańyzdy. Sebebi, shikizat óńdelip satylsa, daiyn ónimge suranys bolady. Tipti, Aqtóbe rels-arqalyq zaýytynyń ónimin satý máselesi sheshilmei tur. Qazir zaýyt 100 myń tonna ónim shyǵarady. Al óndiris orny jylyna 200 tonna rels, 230 tonna pishindi ilek shyǵara alady. Basshylary 600 myń tonna ónim shyǵarý múmkindigi bar ekenin aitady. Tek satyp alýshylardy izdestirgen jón», – deidi oblys ákiminiń orynbasary Asqar Biahmetov.
Rels-arqalyq zaýyty keler jyly Reseiden 100 myń tonna, Ózbekstannan 30 myń tonna tapsyrys alǵan. Endigi ýaqytta ónimniń ózindik qunyn azaitý úshin bolat quiý tsehyn salý jospary bar.
Aita keteiik, «QazaqOil» seriktestigi jylyna 300 million tonna suiyltylǵan gaz shyǵaratyn gaz óńdeý zaýytyn salýdy usyndy. Bul jumys qytailyq kompaniiamen birlese iske asyrylýy múmkin. Investitsiia tartý jumysyna keler bolsaq, 9 aida 211,2 milliard teńge Aqtóbe ekonomikasyn kóterýge jumsaldy. Ótken jyldyń kórsetkishine jetý úshin taǵy 150 milliard teńge qajet. Oblys ákiminiń orynbasary Qairat Bekenovtiń aitýynsha, qor bar, tapsyrma tolyq oryndalady. Qur sózge kúmánmen qaraǵan óńir basshysy Berdibek Saparbaev qaǵaz ben qaryndash alyp, naqty esep júrgizýdi tapsyrdy.
