Japoniianyń IT tehnologiia salasyndaǵy iri kompaniialary Qazaqstan Prezidentiniń eldi Úshinshi jańǵyrýǵa bastaityn tyń bastamasyna qyzyǵýshylyq bildirip otyr. Bul týraly «Nur Otan» partiiasy Tóraǵasy Birinshi orynbasarynyń halyqaralyq jáne partiiaaralyq yntymaqtastyqty nyǵaitý maqsatynda Japoniiaǵa jasaǵan sapary barysynda belgili boldy, dep habarlaidy "Ult aqparat".
Atap aitqanda, beinekameralar arqyly adam men nysandy anyqtap, biometrikalyq derekterdi óndeýmen ainalysatyn «NEC» kompaniiasy Úshinshi jańǵyrýda aitylǵan tsifrlyq tehnologiianyń Qazaqstandaǵy qoldanys aiasyn keńeitý maqsatynda bizdiń elmen áriptestik ornatýǵa daiyn.
Odan bólek, Muhtar Qul-Muhammed Japoniianyń premer-ministri Sindzo Abemen, eldegi basty saiasi kúsh sanalatyn bileýshi Liberaldy-demokratiialyq partiianyń Bas hatshysy Tosihiro Nikaimen, Japoniia Parlamentindegi Qazaqstanmen dostyq ligasynyń tóraǵasy Takeo Kavamýramen kezdesip, ekijaqty kelissózder júrgizdi.
Osydan bir ǵasyrǵa jýyq ýaqyt buryn Alashorda úkimetin qurǵan qazaq ziialylary Japoniia tájiribesin jiti zerttep, kóp úirengen. Jas Muhtar Áýezov «Iaponiia» atty maqala jazyp, 1919 jyly «Abai» jýrnalyna jariialaǵan. Alashtyń ardaqty aqyny Sultanmahmut Toraiǵyrov ta Japoniia eliniń damý tarihy týraly tamasha jazbasyn qaldyrǵan. Endeshe Alash murasyn jan-jaqty zerttegen Muhtar Qul-Muhammedtiń Kúnshyǵysqa qarap boi túzeýi qýanyshty ári quptarlyq bastama.
