Densaýlyq saqtaý ministri Aleksei Tsoi Medsupportkz qaýymdastyǵynyń ǵalymdary men dárigerleriniń koronavirýsqa qarsy QazVac vaktsinasy boiynsha málimdemesine pikir bildirdi, - dep habarlaidy Tengrinews.kz.
"Meditsinalyq qoǵam Qazaqstannyń otandyq Qazvas vaktsinasyn ázirleýdegi joǵary jetistigin maquldaidy, ol qazir bizde qoldanýǵa ruqsat etilgen. Vaktsina klinikalyq synaq kezeńderinen ótti, qazir klinikalyq tájiribede. Bul vaktsinany bioqaýipsizdik salasynda jumys isteitin preparatty jasaǵan salanyń jetekshi mamandary rastaidy. Densaýlyq saqtaý júiesinde barlyq maman osy áleýetimizdi joǵary baǵalaidy.
Iá, óz kózqarasyn bildiretin adamdar men mamandar bar. Biraq jalpy barlyǵy vaktsinanyń paida bolýyn qoldaidy. Bilim jáne ǵylym ministrliginiń aqparaty boiynsha, biologiialyq qaýipsizdik problemalary institýty reitingi joǵary jýrnaldarǵa birneshe maqala jariialaýǵa jiberdi.
Nusqaýlyqta negizgi aqparattar, qoldaný nusqaýlyǵy, tiimdiligi, oń kórsetkishter men qarsy kórsetkishteri boiynsha pozitsiiasy qamtylǵan", - dedi Aleksei Tsoi OKQ onlain-brifinginde.
Ol vaktsina týraly barlyq negizgi aqparat halyqqa jetkiziletinin aitty.
"Vaktsinatsiia kezinde bul bizdiń azamattarymyzǵa aityldy. Klinikalyq zertteýlerdiń neǵurlym naqtyraq parametrleri jaqyn arada jariialanady. Munda eshqandai qupiia joq. Bul - taza protsedýralyq protsess.
Jalpy, QazVac - Qazaqstan úshin úlken progress. Men de osy vaktsinany saldyrdym, ózimdi jaqsy sezinemin jáne turǵyndarǵa da osy vaktsinany egýge keńes beremin", - dedi Densaýlyq saqtaý ministrliginiń basshysy.
Aita keteiik, sáýir jáne mamyr ailarynda elimizdiń barlyq óńirlerine QazVac vaktsinasynyń jalpy 100 myń dozasy jetizilgen bolatyn.
Búginde QazVac vaktsinasynyń birinshi dozasymen shamamen 41 myń adam, ekinshi dozasymen 22 myń adam ekpe aldy.
