«Baiqońyr» aýdandyq politsiia basqarmasynyń kriminaldyq politsiia qyzmetkerleri quny 18 mln teńge bolatyn «LW 300 KN» markaly avtotiegishti aidap áketken 2 kúdiktini ustady, dep habarlaidy QazAqparat.
Nur-Sultan qalalyq politsiia departamentiniń málimetinshe, quqyq qorǵaý organdaryna jaýapkershiligi shekteýli seriktesterdiń biriniń júrgizýshisi júginip, túngi ýaqytta Alash tasjoly boiynda qaldyrǵan avtotiegishiniń urlanǵanyn habarlaǵan. Onyń aitýynsha, jumystan keiin kóligin jol boiyna qaldyryp, úiine ketken. Al tańerteń kóliktiń urlanǵanyn bilip, politsiiaǵa júgingen.
«Jedel izdestirý is-sharalary barysynda politsiia qyzmetkerleri kólikti aidap áketý kúdigimen qalanyń 29 jastaǵy 2 turǵynyn ustady. Qaskúnemder iesiz kólikti baiqap, jaqyn mańda beinekameralardyń jáne bógde adamdardyń joqtyǵyn paidalanyp, avtotiegishti aidap áketken. Kúdiktiler urlanǵan kólikti tún ýaqytynda qala mańyndaǵy aýyldardyń birine jasyrǵan. Olar avtotiegishti basqa qaladaǵy satyp alýshyǵa 6 mln teńgege saýdalamaq bolǵan. Bul úshin olar uzyn ólshemdi júk kóliginiń júrgizýshisimen avtotiegishti tasymaldaýǵa ýaǵdalasqan», - dep atap ótedi departamentten.
Vedomstvo aqparatyna sáikes, qazirgi ýaqytta atalǵan fakti boiynsha qylmystyq is qozǵaldy. Kúdiktiler qalalyq politsiia departamentiniń ýaqytsha oqshaýlaǵyshyna qamaldy. Olardyń elorda aýmaǵynda jasalǵan osyndai qylmystarǵa qatysy tekserilip jatyr.
