8 qańtar kúni jemqorlyq deregimen ustalǵan QR eńbek sińirgen qairatkeri, akter, M. Áýezov atyndaǵy Qazaq memlekettik akademiialyq drama teatrynyń burynǵy basshysy Erlan Biláldi qoldaý maqsatynda birqatar óner adamdary, tanymal ádebiet jáne mádeniet qairatkerleri baspasóz konferentsiiasyn ótkizip, ózderiniń ashyq pikirlerin ortaǵa salǵan bolatyn. Óz kezeginde, elimizge belgili aktrisa Kúnsulý Shaiahmetova bul jaǵdaidy ónerge jasalǵan qiianat dep atady:
"Dosty aparyp dosyna jamandatyp, aǵaiyndy azdyrǵan aramzalar qaptaǵan osynaý kúnderi men qalai únsiz qalaiyn?! Joq jerden opyq jep otyrǵan Erlan Bilál – taza óner adamy. Oǵan daý bolmasa kerek-ti.
...Býynsyz jerge pyshaq urylǵan sátte, «elim!» deitin erdiń eńsesin túsirgen jaǵdai - meniń janyma qatty batty. Ónerge qiianat jasalyp jatyr, aǵaiyn! Men de Qazaq óneri úshin azdy-kópti eńbek etip júrgen janmyn!..
«...Sheshe turyp qyz sóilese - boijetkeni» deidi. Boijetip turǵanymnan emes, basymdy iip turmyn, aǵalarym. Mádeniettiń, ádebiettiń maitalmandary, bul Ónerge qasaqana jasalǵan qiianat. Myna, Reseide Primadonna deidi ǵoi, barlyqtaryńyz bilesizder, osyndai bir qiturqy tirlikterge tartylyp jatqan kezde Resei prezidenti – V.Pýtin «bul Resei halqynyń ózin qaralaýǵa jasalyp jatqan dúnie, halyqtyń betke ustaryn ne istep jatyrsyńdar, barlyq bos áńgimeni qurtyńdar, joǵaltyńdar!» degen edi. Sizder aq pen qarany ajyratyp, halyqqa jón silteisizder.
Qadirli tilshiler! Sizder aqparatty qalai jetkizesizder, búkil qazaq solai túsinedi. Ana balasyna qandai nietpen iip omyraýynan sútin beredi, bala ony solai emedi. Men sizderdi solai dep bilemin. Arasha túsińizder! Parany alǵan emes, bergen adamdy da sot aldyna tartyńyzdar! Ol da jazalansyn! Endi qaityp ónerge qiianat jasalmasyn, aǵaiyn. Men júregimnen ún qatyp turmyn. Bir nárse aitqym keledi. Aq-qarasyn ajyratpai jatyp, adamdy azǵyrmaiyq. Asyryp aitpaiyq! Bul qazaqtyń ónerine jasalǵan qiianat, iritip-shiritý dep bilemin. «Mal jutasa da, óner jutamaq emes». Eger, sizder shyndyqtyń betin ashpasańyzdar, onda aǵanyń tizesiniń iilgeni - iilgen. Al, qazir, búkil marǵasqalarymyz otyr aldaryńyzda, bári jiylyp qazaqtyń arda azamatyn jaqtap otyr! Osydan artyq qandai aqtaý kerek. «Elim» dep eńiregen erge kúie jaǵyldy. Osyndaida bir-birimizge meiirim-shapaǵatymyzdy tógip, qamqor kóńilde bolmasaq, adamdyǵymyz, adamgershiligimiz qaisy?"
5 qańtarda jemqorlyqqa qarsy qyzmettegiler M. Áýezov atyndaǵy Qazaq memlekettik akademiialyq drama teatry direktory Erlan Biláldiń Jańa jyl kezinde balalarǵa qoiylym qoiý maqsatynda teatrdan oryn berý úshin zańdy tulǵadan 1,5 million teńge para aldy degen kúdikke ilingenin habarlady.
Sol kezde QR Memlekettik qyzmet isteri jáne sybailas jemqorlyqqa qarsy is-qimyl agenttiginiń resmi ókili Nurlan Jahin: "Kinásin tolyq moiyndaýyna bailanysty ol qamaýǵa alynǵan joq. Sotqa deiingi tergeý sharalary júrip jatyr", - dep málimdegen edi.
Erlan Bilál 2015 jyldyń 27 sáýirinen bastap M. Áýezov atyndaǵy Qazaq memlekettik akademiialyq drama teatry direktory qyzmetinde bolǵan edi. Direktor bolǵan kezde ol Qazaq handyǵynyń 550-jyldyǵyna, Táýelsizdiktiń 25 jyldyǵyna orai birneshe is-shara ótkizip, sondai-aq, Astanadǵy EXPO 2017 kórmesi kezinde gastrolder uiymdastyrǵan. Onymen qosa, Erlan Bilál teatrdyń 90-jyldyǵyn joǵarǵy deńgeide atap ótken-tin.
2017 jyldyń jeltoqsan aiynyń sońynda Áýezov teatry Erlan Biláldiń bastamasymen QR Prezidentiniń "Rýhani jańǵyrý" baǵdarlamasynyń aiasynda Tokioǵa attandy. Japoniiada kórsetilgen "Aqtastaǵy Ahiko" spektali myńdaǵan adamdy jinady, sondai-aq, Japoniianyń jergilikti teatr synshylary da bul qoiylymdy joǵary baǵalaǵan edi.
.jpg)