Aqtóbelik Áliia Kenjalina Qarttar kúni quttyqtap barǵan depýtattarǵa ómir jolyn aityp, jastardyń erinbei eńbek etýge shaqyrdy, dep habarlaidy QazAqparat.
Nur Otan partiiasy Aqtóbe oblystyq filialy tóraǵasynyń birinshi orynbasary Erbol Danaǵulov pen oblystyq máslihattaǵy fraktsiia músheleri elimizdiń órkendeýine úles qosqan aǵa býyndy Halyqaralyq qarttar kúnimen quttyqtady. Olardyń kóbi - malshy, ustaz, kolhozda eńbek etken qarapaiym eńbek adamy.
Qurmetke bólengen Áliia Kenjalina qazir 85 jasta. Ol 12 jyl boiy joldasy Serikbai Jumabaevpen birge Shalqar aýdany, Bershúgir sovhozynda qoi baqqan. Keiin joldasy fermanyń zootehnigi, al ózi dúkenshi bolyp qyzmet istedi. Qazir Áliia Kenjalina 9 bala tárbielep, odan 34 nemere, 26 shóbere súiip otyr. Joldasy osydan 5 jyl buryn dúnieden ótipti.
«Eńbekpen el kógerer» degen. Jastaiymnan eńbekke aralastym. Túzde shóp tasyp, mal baqtym. Er azamattyń jumysyn istesedim. 15 jasymda ákem eski tigin mashinasyn alyp bergen, sonymen úide is tiktim. Kúnine 4 saǵat qana uiyqtadyq. Qazirgi jastar bizdei eńbek etse, elimizdiń jaǵdaiy áldeqaida jaqsy bolar edi», - deidi batyr ana Áliia Kenjalina.
Nurotandyqtar quttyqtap barǵan ardagerlerdiń biri — Ajar Orazǵalieva. Ol el basyna kún týǵan shaqta ózi suranyp soǵysqa attanǵan. Ol kezde nebári 18 jasta bolatyn. Qarshadai qyz qarý asynǵan qurbylarymen birge basqynshylardyń talai shabýylyna tosqaýyl jasady. Zenitpen atqylap, fashisterdiń ushaqtaryn qulatqan ýaqyttary da máńgi jadynda. Ardager Kýrsk, Orel, Belgorod, Harkov, Kievti jáne Rýmyniia, Vengriiany azat etýge qatysyp, Jeńisti Berlinde qarsy alǵan eken.
«Úlkendi qurmettep, syilai bilgen elmiz. Kónekóz qariialarymyzdyń ómirlik tájiribesi men aqyl-keńesi, tálim-taǵylymy bólek. Árqaisysy ǵumyrynyń eń qyzyqty da jarqyraǵan jastyq shaǵyn elimizdiń órkendeýine, keler urpaqtyń igiligine arnady. Urpaqqa bergen ulaǵatty tálim-taǵylymdary men qoǵam ómirine qosqan úlesi úshin aǵa urpaqqa rizashylyǵymyz sheksiz», - deidi Erbol Danaǵulov.
