Ońtústiktiń erikti jastary “Ehro-2017” halyqaralyq kórmesinen oraldy. Jas poliglottar 35 kún boiy aitýly halyqaralyq sharaǵa qatysyp, sheteldik meimandarǵa kórmeniń jeke-aimaq pavilondaryn tanystyryp, mártebeli sharaǵa belsene atsalysyp qaitty. Kúngeilik jastolqynnyń eńbegin elegen uiydastyrýshylar tarapy 3 tildi jetik meńgergen jastarǵa zor qurmetpen alǵys hat tapsyryp, arnaiy marapattady.
Mundai qýanyshty habardy oblystyq jastar saiasaty máseleleri jónindegi basqarmasynyń basshysy Balmarjan Polatqyzy Narbekova málimdep otyr. Aitýynsha, bul igi bastama mádeni sharaǵa qatysyp qaitqandardy qanattandyryp qana qoiǵan joq, tiisinshe kúngeilik jastolqynnyń úsh tildi meńgerýge degen qulshynysyn arttyrdy. Iaǵni, bul arqyly Elbasymyzdyń «Úsh tuǵyrly til» memlekettik baǵdarlamasy da júieli júzege aspaq.
«Óte áserli boldy. Qýanyshtymyn! Umytpaityn sátter! «NurÁlem» pavilony men ózge de jeke-aimaqtardyń erekshelikteri men mán-mazmunyn baǵamdap, bolashaqqa qajetti degen energiia-qýat kózin atap ótip, sheteldikter aldynda tolyǵymen tanystyrý – men úshin úlken mártebe boldy! Elimizdiń búgingi jetistikterimen tanystyrǵanda boiymdy qýanysh, maqtanysh sezimderi kernegenin jasyra almaimyn! Sondai-aq, halyqaralyq kórmede jái júrgen joqpyn, qajetti aqparlardy oiyma túiip, qaǵazǵa túrtip aldym. Keleshekte men de ǵalym bolyp, elimniń órkendeýine úles qossam degen jospar túzdim» – dep, jas eriktiler jasaǵanyń tóraiymy Botakóz Iztileý «Ehro» kórmesinen alǵan áserimen bólisti.
Aita óteiik, “Ehro-2017” halyqaralyq kórmesine osydan 1 ai buryn Ońtústiktiń 150 jasy attanǵan bolatyn. Ázirge onyń 135-i keldi. Úzdik dep tanylǵan 15 jas elordamyz – Astanada qalyp, tórtkúl dúniege Qazaqstannyń tyń týyndylaryn tanystyrýdy jalǵastyrmaq.
