Elbasy Nursultan Nazarbaev «Bolashaqqa baǵdar: rýhani jańǵyrý» atty maqalasynda ár azamattyń óziniń týǵan jerine, ainalasyna jaqsylyq jasap, qaiyrymdylyqpen ainalysýy kerektigin aitqan bolatyn. Rýhani jańǵyrýdyń negizderiniń biri – azamattardyń boiyna qaiyrymdylyq qasietterdi sińire bilý. Týasy, bireýge jaqsylyq jasaý úshin bai bolý shart emes. Tek jyly júrek pen alǵaýsyz peiil bolsa jetkilikti. Demek, bireýge qýanysh syilaǵyńyz kelse, ol úshin eń aldymen júregińiz meiirimge toly bolýy kerek.
Osyndai maqsatpen Ońtústik Qazaqstan pedagogikalyq ýniversiteti «Pedagogika jáne psihologiia» kafedrasynyń janynan qurylǵan «Jalyndy jastar» klýbynyń músheleri ár ai saiyn túrli qaiyrymdylyq sharalarǵa qatysyp, qazynaly qarttarymyz ben jas búldirshinderdiń kóńilderine qýanysh, júzderine kúlki syilaýda.
Oǵan dálel taiaýda ótken «Júrekten – júrekke» qaiyrymdylyq aktsiiasy bola alady. Aktsiia barysynda klýb músheleri Tólebi aýdandyq balalar úiine, Shymkent qalasyndaǵy qarttar úiine baryp, túrli kontserttik baǵdarlamalar qoiyp, kóńili jarym jandardyń mereiin asqaqtatyp qaitty.
«Qazir boi jarystyratyn emes, oi jarystyratyn zaman» dep Elbasy aitqandai, búgingi tańda adamnyń dárejesi tek bilimimen ǵana ólshenbek. Sondyqtan klýb músheleri Shymkent qalasyndaǵy kóptegen kitaphanalarmen tyǵyz bailanys ornatqan. Ondaǵy árbir is-sharaǵa belsendi atsalysyp júr. Sondai-aq, klýb janynan qurylǵan «Shuǵyla» bi toby da búginde oblys kóleminde ótetin túrli is-sharalarda óner kórsetýde.
«Adamdyq boryshyń – halqyńa eńbek qyl,
Aq joldan ainyma, ar saqta, ony bil» degen Shákárim Qudaiberdiuly atamyzdyń ósietin basshylyqqa alǵan jastar elimizdiń rýhani jańǵyrýyna osyndai qaiyrymdy áreketteri arqyly úles qosyp júr.
Nurgúl NAMURATOVA,
OQPÝ pedagogika jáne psihologiia mamandyǵynyń stýdenti,
«Jalyndy jastar» klýbynyń prezidenti.
