Soltústik Qazaqstan oblysynyń ákimi Qumar Aqsaqalov «Ońtústikten soltústikke kóshý» baǵdarlamasyn túsindirý maqsatynda Shymkentke arnaiy keldi, dep habarlaidy "Ult aqparat".
«Ońtústikten soltústikke kóshý» baǵdarlamasy 2013 jyly qabyldanǵan «Jumyspen qamtý 2020 jol kartasy» baǵdarlamasy negizinde júzege asyrylyp jatyr. Maqsat - soltústik pen shyǵystaǵy jumys kúshi tapshy aimaqtarǵa ońtústiktegi «jumys kúshi artyq» oblystardan halyqty kóshirý.
Baǵdarlama búginde qarqyndy júzege asýda. Respýblikanyń Soltústik oblystaryna óz erkimen barǵysy keletinderge memleketten sýbsidiia, odan bólek kóptegen jeńildikter qarastyrylǵan. Baǵdarlamanyń halyq úshin ońtaily tustaryn túsindirýge arnaiy kelgen SQO ákimi Qumar Aqsaqalov Shymkent ákimi Ǵabidýlla Ábdirahymovpen jáne qala turǵyndarymen kezdesti.
2016 jyly elimizdiń ózge óńirlerinen Soltústik Qazaqstan oblysyna 125 otbasy - 546 azamat qonys aýdardy. Olarǵa 63 eldi mekennen baspana berilip, eńbekke jaramdy azamattar jumyspen qamtyldy. Al, byltyr Qyzyljar óńirine 376 azamat nemese 81 otbasy kóship keldi. Biyl jyl basynan beri 196 otbasy, iaǵni, 682 turǵyn ońtústikten soltústikke qonys aýdardy.
«Biraz adam kóship keldi. Ol jaqqa barsańyzdar biraz aǵaiyndaryńyzdy tabasyzdar. Biznesterin ashqan azamattar, jetistikke jetken azamattar az emes. Úkimet berip otyrǵan múmkindikti jaqsy paidalanyp, biznesterin ashty. Keibir máseleler bar, árine, kepildik jóninde, nesieleý jóninde. Ol máseleni sheshýdiń mehanizmin tabýǵa bolady», dedi shymkenttiktermen kezdesken SQO ákimi Qumar Aqsaqalov.
Túrkistan oblysynan biyl qonys aýdarǵan 263 otbasynyń 63-i Qostanai oblysyna, 50 otbasy Shyǵys Qazaqstanǵa qonys aýdarsa, 43 januia Soltústik Qazaqstandy tańdaǵan. 107 otbasy Pavlodar oblysynda tútin tútetip jatyr.
«Qazaqstan - bizdiń keń baitaq jerimiz. Árbir sharshy metri - ol bizdiń jerimiz. Elbasymyz da aitty ǵoi, halyq mobildi bolýy kerek. Amerikada da Niý Iorkta turyp, San-Frantsiskoǵa baryp, jumysty qatynap isteidi. Soltústik Qazaqstanda jer óte qunarly, aýyl sharýashylyǵynda júrgen bizdiń biraz azamattar baryp, jer alsa, kartop egip, basqa nárselerdi egip, mal asyraýǵa jaǵdai jasalatyn bolsa, ol jaqqa baram degen azamattar kóp bolady», - deidi Shymkent qalasynyń ákimi Ǵabidýlla Ábdirahymov.
Mamandardyń esebinshe, Soltústik Qazaqstan oblysynda 1031 bos jumys orny bar. Ózge óńirden teriskeige qonys aýdarǵandardy 224 eldimeken qabyldai alady.
«Biz - agrarly óńirmiz. Sondyqtan ekonomikanyń negizgi salasy - aýyl sharýashylyǵy. Qazir oblysta jańa tehnika óte kóp, 1 kombaiyn shamamen 100 mln teńge turady, sebý kesheni bar traktordyń quny - 30 myń AQSh dollary. Sol sebepti, aýyl sharýashylyǵynda eńbek etkisi kelgen adamnyń daiyndyǵy bolý kerek. Búginde aýyl sharýashylyǵy ónimin óndirýshiler jumys isteýge kelgen adamnyń búgin istep, erteń ketip qalmaitynyna senimdi bolǵysy keledi. Bizge ýaqytsha qonys aýdarýshylar emes, turaqty turǵyndar kerek», - deidi SQO Qumar Aqsaqalov.
Qyzyljar óńirine ózge oblystardan qonys aýdarǵan otbasylarǵa meiilinshe kómek kórsetilip keledi. Olardyń jolaqysy tolyqtai ótelip, úi-jaimen, jumyspen qamtylýda. Sondai-aq, otbasynyń ár múshesine 35 eseptik ailyq mólsherinde kótermeaqy tólenip jatyr.
