Foto: AzattyqtanAtyraý oblysy Qulsaryda sý tasqynynan zardap shekken turǵyndar baspananyń shyǵynyn óteýdi talap etip, ortalyq alańǵa jinaldy. Keshki saǵat segizde jinalǵan jurt túngi saǵat 1-ge deiin taramady dep habarlaidy "Ult Aqparat" Azattyqqa silteme jasap.
Olar bir sharshy metr úshin 400 myń teńge tóleýdi talap etti jáne aqsha qolǵa berilsin ne “esepshotymyzǵa aýdarylsyn” degen talap aitty. Kei turǵynnyń aitýynsha, alańǵa jinalǵan turǵyndar qarasy kóbeiip, birneshe júzge jetken. Olar talaptaryn oryndalmaiynsha alańnan ketpeitinin aitqan. Halyqty syrtynan politsiia baqylaǵan.
Jinalǵandardyń biri úsh balanyń anasy Jazira Qulmuhanova týystarynyń úiinde turýdan sharshaǵanyn aitady. Ol “úkimet sýǵa ketken úidiń alańynyń ár sharshy metrin 400 myń teńgeden eseptese, qalaǵan jerden úi satyp alýǵa múmkindik týar edi” deidi. Ózi Qulsarydan kóshýdi oilap otyr, sebebi “ózi turǵan jańa úidei baspana munda endi tabylmaidy” deidi.
Al Tolqyn Qojahmetova qazir bir rettik 369 myń teńge kólemindegi materialdyq kómek esebinen sarai jaldap otyrǵanyn jáne munyń bári qansha ýaqytqa sozylatyny belgisiz” dep shyǵyndy tez arada óteýin suraidy.
- Qartaiǵanda tym bolmasa ózimiz úshin ómir súremiz dep oiladyq, balalardy túgel úilendirdik, turmysqa berdik. Endi qalai ómir súremiz degen suraqqa taǵy da basymyzdy qatyryp kelemiz! Munai ústinde otyrmyz ózimiz osy turǵanda, al kúiimiz mynaý, aianyshty. Turǵyn úi alańyna qarai 1 sharshy metrge 400 myń teńge tólensin. Úilerdi qalai salýdy jáne qaida turýdy ózimiz sheshemiz, - dedi Qojahmetova.
Turǵyndar aldyna áýeli aýdan ákimi orynbasarlary Gúlnafiz Aishýaqova men Nurbolat Sarmanov keldi. Olar barlyq turǵyn úi shyǵyndary tólenedi dep ýáde berdi. Keiin aýdan ákimi Jumabek Qarajanov ta muny qaitalady. Turǵyndar ákimniń ýádesinen sharshaǵanyn, endi tek prezident Toqaevqa qairylatynyn aitady. Olar tikelei efirde Toqaevqa úndeý joldap, alańǵa óz únin oǵan jetkizý úshin beibit túrde jinalyp jatqanyn alǵa tartty.
