QR Bilim jáne ǵylym ministri Kúlásh Shámshidinova úsh balany órtten qutqarǵan stýdent Nursultan Ismaǵulovty marapattady, dep habarlaidy "Ult aqparat" ministrliktiń baspasóz qyzmetine silteme jasap.
L.Gýmilev atyndaǵy EUÝ aqparat jáne tehnologiialar fakýltetiniń 2 kýrs stýdenti, 21 jasar Nursultan Ismaǵulov Nur-Sultan qalasyndaǵy kópqabatty úilerdiń birinen shyqqan órt kezinde batyldyq tanytyp, úsh balanyń ómirin saqtap qalǵan bolatyn. Oqys oqiǵa Beibitshilik kóshesinde boldy.
«Óz ómirin táýekelge tigip, qiyndyqqa túsken adamǵa kómek qolyn sozýǵa umtylatyn jastar maqtaýǵa turarlyq. Árine, osyndai batyl da erjúrek balany ósirip, tárbielegen Nursultannyń ata-anasyna alǵys aitqymyz keledi. Osyndai jigerli balalardyń qalyptasýy barysynda mektep pen bilim ordalaryndaǵy ustazdardyń atqaratyn róli orasan. Bizdiń ortaq maqsatymyz - óskeleń urpaqtyń kúshti, jigerli, batyl bolyp ósýine barynsha qolymyzdan kelgenshe áreket etý. Nursultan siiaqty jastar - bizdiń zamanymyzdyń naǵyz batyrlary», - dep atap ótti, erjúrek stýdentti marapattaǵan Bilim jáne ǵylym ministri K.Shámshidinova.
Sol kúni Nursultan dostarymen astanalyq saiabaqtardyń birinde serýendep júrgen. Adamdardyń shýlap jatqanyn estip olar oqiǵa bolǵan jerge dostarymen tez jetedi. Turǵyn úidiń ekinshi qabatynan er adamnyń kómekke shaqyrǵan daýysyn estidi. Nursultan eshbir kidirmesten tómende ornalasqan dúkenniń shatyry arqyly úidiń ekinshi qabatyna kóterilip, úidiń terezesin syndyryp, úsh balany órtke oranǵan páterden alyp shyqqan.
Oqiǵa ornyna jetken órt sóndirýshiler páterde qalǵan taǵy bir kishkentai bóbek pen otaǵasynyń ómirin arashalap qaldy.
