Álemniń 160-raketkasy, qazaqstandyq tennisshi Mihail Kýkýshkin Ýimbldon týrniri irikteý saiystarynyń finalyna shyqty, dep habarlaidy QazAqparat.
Ol irikteý saiystarynyń jartylai finalynda dúniejúzilik reitingte 230-orynda turǵan germaniialyq, 38 jastaǵy Filipp Kolshraibermen kúsh synasty.
Birinshi partiiada tai-breikte germaniialyq sportshy sátti oinady – 7:6 (7:4).
Esesine ekinshi sette Kýkýshkin qarymta qaiyrdy – 6:3.
Úshinshi, sheshýshi partiiada ol 2:0 esebimen alǵa ketti. Esep 5:2 bolyp, matchqa dop bergende, qazaqstandyq tennisshi sol múmkindigin paidalana almady. Degenmen sodan soń maqsatyna jete bildi – 6:4.
Eki saǵat 20 minýtqa sozylǵan báseke barysynda Kýkýshkin 4 eis jasap, 8 breik-pointtyń teń jartysyn paidalandy. Qarsylasy 8 eis, 2 breikpen kózge tústi.
Kýkýshkin irikteý saiystarynyń finalynda álemniń 178-raketkasy, majarstandyq Jombor Piroshpen kezdesedi. Ony jeńse, biylǵy úshinshi «Úlken dýlyǵa» jarysyna joldama alady.
