Qańtardaǵy tártipsizdik kezinde tonaýǵa qatysqan adamdardy anyqtaý jalǵasyp jatyr. Bul týraly IIM tergeý departamentiniń bastyǵy Sanjar Ádilov aitty, dep habarlaidy QazAqparat.
«Urlyq pen tonaý, onyń ishinde jappai tártipsizdik kezinde qarý urlaý faktisi boiynsha 322 kúdikti ustalyp, ýaqytsha ustaý izoliatoryna qamaýǵa alyndy. Tergeý barysynda basty nazar istiń mán-jaiy men kúdiktilerdiń dálelderin muqiiat tekserýge, dáleldemeler jinaýǵa aýdarylady. Buryn habarlanǵandai, tergeýshilerdiń búkil is júrgizý sheshimderi, atap aitqanda, kúdiktini qamaýǵa alý, onyń áreketterin saralaý, sondai-aq bultartpaý sharalaryn tańdaý qylmystyq protsestiń úsh býyndy modeli aiasynda qabyldanady. Prokýrormen kelisiledi», - dedi ol ortalyq kommýnikatsiialar qyzmetindegi brifing barysynda.
Onyń atap ótýinshe, búkil kúdiktiler meditsinalyq kýálandyrý arqyly dene jaraqatynyń bar-joǵyn anyqtaý úshin tekseriledi.
«Dene jaraqaty bolǵan jaǵdaida onyń mán-jaiy anyqtalǵannan keiin ǵana ýaqytsha ustaý izoliatoryna qamalady», - dedi departament bastyǵy.
