«Qazaqstan temir joly» ulttyq kompaniiasy Almaty oblysyndaǵy Shamalǵan stansasynda jolaýshylar avtobýsymen poiyzdyń soqtyǵysýy týraly tolyqqandy aqparat berdi, dep habarlaidy "Ult aqparat".
«2019 jyldyń 15 qyrkúiek kúni 19 saǵat 08 minýtta Almaty jol bólimshesiniń «Aqseńgir – Shamalǵan» ýchaskesinde №43 «Almaty-Qostanai» Jolaýshylar poiyzy (jeke tasymaldaýshy «Týrksib-Astana» JShS) avtobýspen soqtyǵysty. Oqiǵa 4028 shaqyrymda ornalasqan kúzetiletin-retteletin ótpede boldy. №43 jolaýshylar poiyzy ótkelge jaqyndaǵanda signal berý qurylǵylary avtomatty túrde iske qosyldy. Dybystyq signal qosyldy, ótý baǵdarshamdarynyń qyzyl shyraǵy jandy. Shlagbaým ótkelde turǵan avtokóliktiń saldarynan sońyna deiin túspegen«, - dep habarlady Ulttyq kompaniianyń baspasóz qyzmeti.
QTJ-da atap ótkendei, ótkel kezekshisi jolaýshylar poiyzyn toqtatý úshin tosqaýyl baǵdarshamyn iske qosý boiynsha sharalar qabyldaǵan.
«№43 jolaýshylar poiyzynyń mashinisi shuǵyl tejeýdi qoldandy, biraq az qashyqtyqtan soqtyǵysýdyń aldyn ala almady. Soqtyǵysý kezinde avtobýs jol jiegine shyǵyp ketti. Biraq, KZ4AC-0010 elektrovozy relsten shyǵyp ketpei, búlingen. Zardap shekkender bar, sany naqtylanýda. №43 poiyz elektrovozdy aýystyrǵannan keiin 01 saǵat 38 minýtqa keshigip jolǵa shyqty, poiyz jolaýshylary arasynda zardap shekkender joq», - dep atap ótti QTJ.
Bul jaǵdaidy tekserý úshin »QTJ«UK» AQ-da arnaiy komissiiasy quryldy.
Esterińizge sala keteiik, búgin Shamalǵan stantsiiasynda poiyz ben avtobýs soqtyǵysty. Aldyn ala boljam boiynsha, avtobýs temir joldyń relsine shyǵyp ketken.
Oqiǵa ornynda avtobýs júrgizýshisi mert bolyp, taǵy 3 adam Qarasai aýdandyq aýrýhanasynyń jansaqtaý bóliminde jatyr. Onyń ekeýi bala.
Qazir atalǵan fakti boiynsha QR QK 345-babynyń 3-tarmaǵy boiynsha is qozǵalyp, tergeý júrip jatyr. Istiń tergelýin Bas kóliktik prokýratýra óz baqylaýyna aldy.
