Qazaqstan Parlamenti Senatynyń Tóraǵasy Qasym-Jomart Toqaev Sankt-Peterbýrgte Halyqaralyq terrorizmmen kúres jónindegi parlamenttik konferentsiiada baiandama jasady, - dep habarlaidy "Ult aqparat".
TMD-ǵa qatysýshy qatysýshy memleketterdiń Parlamentaralyq Assambleiasy men EQYU Parlamenttik Assambleiasy uiymdastyrǵan forýmnyń kún tártibine qaýipsizdik jáne terrorizmge qarsy is-qimyl salasyndaǵy halyqaralyq yntymaqtastyq, terroristik áreketke qarsy qyzmettiń gýmanitarlyq máseleleri, halyqaralyq qaýipsizdik júiesiniń ekonomikalyq jáne áleýmettik negizderi engen bolatyn.
Q.Toqaev óz sózinde terrorizmdi tek birlesken kúsh-jiger arqasynda ǵana túbirinen joiýǵa bolatynyna nyq senim bildire kelip, Prezident N.Nazarbaevtyń BUU aiasyndaǵy Jahandyq antiterroristik jeli qurý týraly bastamasynyń mańyzdylyǵyna forýmǵa qatysýshylardyń nazaryn aýdardy.
Konferentsiiaǵa qatysýshylarǵa arnaǵan sózinde Q.Toqaev halyqaralyq quqyqtaǵy «terrorizm» uǵymynyń zańdy jáne saiasi qisyndy anyqtamasyn berý qajettigi týraly aitty. Tóraǵa eń kúrdeli máselelerdi jedel sheshýge yqpal etetin saiasi úderisterge asyǵys ári aǵat baǵalaýdan shektelýge shaqyrdy.
«Mundai qadamdardyń nátijeli bolatynyn Siriiadaǵy qarýly qaqtyǵystardyń basynan beri oq atýdy toqtatý tetikterin qurýǵa jetkizýge alǵash ret múmkindik bergen Astana kelissózderi pash etip otyr», - dep atap ótti Senat Tóraǵasy.
Q.Toqaev birde bir el qaýpinen qorǵalmaǵan kiberterrorizm máseleleri týraly da aitty: «Adam quqyqtary men bostandyqtaryn qurmetteýdiń mańyzdylyǵyn tolyq túsingen jaǵdaida qaýipsizdikti qamtamasyz etý úshin internetti retteý máseleleri boiynsha oilanýdyń máni zor. Basty maqsat – ekstremizm ideiasyn nasihattaýǵa jáne jastardy terroristik uiymdardyń qataryna aldap-arbap tartýǵa kedergi jasaý bolyp otyr».
Baiandamada kedeilik, saýatsyzdyq, sybailas jemqorlyq, azamattardyń quqyqtary men bostandyqtaryn shekteý sekildi terrorizmniń bastapqy sebepterin joiýdaǵy zań shyǵarý organdarynyń áleýetine erekshe nazar aýdaryldy. Q.Toqaev EQYU Parlamenttik Assambleiasy sessiialarynyń birinde Ekstremizm jáne terrorizmge qarsy is-qimyl jónindegi uiymnyń Úilestirý ortalyǵyn qurý týraly máseleni qaraýdy usyndy.
Qazaqstan Parlamenti joǵarǵy Palatasynyń basshysy radikalizm qaterlerine qarsy ideologiialyq is-qimylda Álemdik jáne dástúrli dinder liderleriniń Seziniń de mańyzdylyǵyn atap ótti, sondai-aq Astanada 2016 jyly 31 mamyrda ótken, joǵary mártebeli dini qairatkerler, birqatar elderdiń parlamentshileri jáne ǵalymdar qatysqan «Dinder terrorizmge qarsy» halyqaralyq konferentsiianyń qorytyndylary týraly forýmǵa qatysýshylardy habardar etti.
Q.Toqaev qazirgi zamandaǵy reformalar men halyqpen ashyq dialogty terrorizmge qarsy pármendi sharalar retinde atap ótti. Bul turǵyda memlekettik basqarýdy jetildirý jáne bilik tarmaqtary arasyndaǵy ókilettikterdi qaita bólý arqyly zań ústemdigin nyǵaitýǵa baǵyttalǵan Qazaqstandaǵy konstitýtsiialyq reformalardyń mańyzdylyǵy aityldy. Tóraǵa «Terrorizmge qarsy is-qimylǵa qatysty aitqanda, Konstitýtsiiaǵa terroristik áreketke qatysqany úshin Qazaqstan azamattyǵynan aiyrý týraly jańalyq engizildi», - dedi.
Senat Tóraǵasy sóziniń sońynda terrorizmdi oqshaýlaý tájiribesinen ony jappai túbirinen joiý strategiiasyna kóshý - jiti nazar aýdarýdy, dialog pen ózara is-qimyldy talap etetin kúrdeli ári jaýapty jumys ekenin atap ótti.
Q.Toqaev Eýropa Keńesi Parlamenttik Assambleiasynyń Tóraǵasy Pedro Agramýntpen áńgimelesti. Tóraǵa Qazaqstannyń EKPA-men yntymaqtastyǵynyń syndarly sipatyna toqtaldy. Bizdiń elimiz Eýropa Keńesiniń birqatar mańyzdy konfentsiialaryna qatysýshy, Demokratiia jolyndaǵy Eýropanyń quqyqtyq komissiiasynyń (Venetsiia komissiiasy) tolyq múshesi. Qazaqstan Parlamenti men EKPA yntymaqtastyq týraly kelisimge qol qoidy. Qazaqstandyq depýtattar Strasbýrgte EKPA sessiialarynda turaqty túrde qatysady. Q.Toqaev demokratiiany damytý, gýmanitarlyq yntymaqtastyq jáne qaýipsizdiktiń jańa qaterlerine qarsy is-qimyl úshin dialog pen nátijeli yntymaqtastyqty jalǵastyra berý kerek dep sanaidy.
Senat Tóraǵasy EKPA basshysyn Prezidenttiń ókilettikterin Parlament pen Úkimetke berý jónindegi Qazaqstandaǵy konstitýtsiialyq reformalar týraly habardar etti.
