Parlament Senaty Biýrosynyń otyrysy boldy. Palata Tóraǵasy Qasym-Jomart Toqaev sharaǵa qatysýshylarǵa arnaǵan sózinde Memleket basshysynyń Qazaqstan halqyna Joldaýy aiasynda áleýmettik saladaǵy, sondai-aq Jastar jylyn ótkizýge bailanysty mańyzdy mindetter boiynsha depýtattar korpýsy aldyndaǵy jumystardyń negizgi baǵyttaryn belgiledi.
«Senattyń kóptegen depýtattary Parlamentte aimaqtardyń múddesine ókildik etedi. Depýtattar korpýsy men atqarýshy bilik organdary, eń aldymen el aimaqtaryndaǵy áleýmettik máseleler men turǵyndardyń muń-muqtajyna basa nazar aýdarýy tiis. Qoǵamnyń turaqtylyǵyna qaýip tóndiretin jaǵdailarǵa jol bermeý úshin aldyn alý sharalary jedel túrde ári ýaqytynda qabyldanýy kerek», - dedi Senat Tóraǵasy.
Q.Toqaev depýtattardy, ortalyq jáne jergilikti bilik organdaryn qoǵam ómirindegi ártúrli jaǵdailardy naqty ári dálme-dál jetkizý úshin áleýmettik jelilerdi saýatty, jaýapkershilikpen ári bilikti túrde paidalanýǵa shaqyrdy.
Senat Tóraǵasynyń pikirinshe, álem áleýmettik-ekonomikalyq jáne saiasi dúrbeleń kezeńine tap boldy. Qazaqstan óziniń kúmánsiz jetistikterimen qosa, ókinishke orai, nashar tustarymen de kúlli jahandyq qoǵamdastyqtyń bólinbes bólshegi bolyp tabylady. Q.Toqaev bul jaǵdaida bizdiń Prezident Strategiiasynyń maqsattary men mindetterin jurtshylyqqa jetkizý jónindegi jumystardyń ústirt, taptaýryn sipattan arylýyna depýtattardyń nazaryn aýdardy. «Bizdiń memleketimizdiń búgini men keleshegi týraly mazmundy ári qyzyqty pikir almasý bolýy tiis», - dedi Tóraǵa.
Q.Toqaev Jastar jylyna bailanysty birqatar usynystar aitty. Onyń aitýynsha, elimizdegi belsendi ári bilikti jastardyń ókilderin memleket múddesin ilgeriletý isine tartý maqsatynda senatorlardyń belsendi jumys isteýi qajet. Parlament joǵarǵy Palatasynyń basshysy Senatta ótetin is-sharalarǵa, onyń ishinde jalpy otyrystar men komitetterdiń astanalyq jáne aimaqtyq joǵary oqý oryndarynyń stýdentterin, kásiporyndardyń jas jumysshylary men kompaniialar qyzmetkerleriniń qatysýyn uiymdastyrýdy usyndy. Q.Toqaev qoǵamdyq uiymdardyń, onyń ishinde «Jas Otan» ókilderiniń qatysýymen memlekettiń jastar saiasaty máseleleri boiynsha arnaiy sharalar ótkizýdi jón sanaidy.
Q.Toqaevtyń sózinde aitylǵan ózekti máseleler boiynsha Biýro músheleri múddelilik turǵysynda pikir almasty.
Biýro otyrysynda Palatanyń 17 qańtarda bolatyn kezekti otyrysynyń kún tártibi bekitildi.
