Monopoliiaǵa qarsy organ uialy bailanys operatory «Ksell» AQ ústem jaǵdaidy teris paidalanýyna bailanysty tergeýdi aiaqtady, dep habarlaidy "Ult aqparat" QR Ulttyq ekonomika ministrligine silteme jasap.
«Tutynýshy shaǵymyna «Ksell» AQ-nyń «Alǵa-1» tariftik jospar boiynsha internetke qol jetkizý limitinen asyp túskennen keiin 30 myńnan astam teńgeni esepten shyǵarý jáne internetke qol jetkizý úshin 1 Mb úshin 20 teńge tarif boiynsha tólemaqy ala bastaý týraly tutynýshyǵa habarlamaý áreketteri sebep bolǵan», - delingen ministrliktiń Feisbýktegi paraqshasynda.
Tergep-tekserý qorytyndysy boiynsha «Ksell» AQ-nyń áreketterinde ústem jaǵdaidy óz paidasyna jaratý faktileri tirkelgen. Naqtyraq aitqanda, operator tariftik josparlardy merziminen buryn qaita qosýda, abonentte kórsetiletin qyzmetterdiń bonýstyq toptamasy aiaqtalǵan kezde abonenttiń múmkindigin shektei otyryp, neǵurlym joǵary tarifteýge ótý týraly aqparatty abonentke habarlamaǵan. Sondai-aq, tariftik josparlardyń eleýli sharttary týraly abonentterdi tiisinshe habardar etpeý sekildi olqylyqtarǵa jol bergen.
Tergep-tekserý qorytyndysy boiynsha «Ksell» AQ-ǵa qatysty ákimshilik is qozǵalyp, materialdar sotqa qaraý úshin jiberildi.
«Ústem jaǵdaidy teris paidalanǵany úshin tergep-tekserý obektisine monopolistik qyzmetti júzege asyrý nátijesinde alynǵan kiristiń 5 paiyzy mólsherinde aiyppul salynady. Budan basqa, «Ksell» AQ-ǵa Kásipkerlik kodekstiń normalaryn buzýshylyqtardy toqtatý jáne tutynýshylarǵa qarajatty qaitarýdy qosa alǵanda, olardyń saldarlaryn joiý týraly nusqama shyǵaryldy», - delingen habarlamada.
Eske sala ketsek, Almaty qalasy ákimshilik soty 2015 jyly da «Ksell» AQ-ǵa somasy 252 660 251 teńge aiyppul salǵan bolatyn.
