Foto ashyq derekkózden alyndy
Kremlde 2024 jyly ótetin prezident sailaýyna daiyndyqty bastap ketken. Resei prezident ákimshiliginiń sheneýnikteri soǵysqa qaramastan sailaý ýaqytynda – kelesi jyldyń naýryzynda ótedi dep úmittenedi. Bul jóninde Kremlge jaqyn derekkózderge súiengen reseilik "Kommersant" basylymy jazdy, dep habarlaidy Azattyq.
2020 jyly qabyldanǵan Konstitýtsiiaǵa engizilgen ózgerister Pýtinniń prezident merzimin "nólge teńestirip", oǵan 2024 jyly jáne 2030 jyly ótetin sailaýlarǵa qatysýyna múmkindik bergen. 2000 jyldan beri prezident bolyp kele jatqan Pýtinniń ózi (2008-2012 jyly úzilis bolǵan) sailaýǵa qatysatyny týraly ázirge eshteńe demedi.
"Ideologiialyq mazmuny ázirge belgisiz, dese de ol birlik taqyrybyna negizdeledi dep aitylady" dep jazdy basylym.
Kremldegiler 2023 jylǵy aimaq sailaýynda túrli tehnologiialar men ideialardy synap kórmekshi. Basylym tilshileri Ýkrainadaǵy soǵysqa qatysqandar men týystaryna kóńil bólinetinin, odan bólek jýyrda anneksiialap alǵan Ýkrainanyń tórt oblysyndaǵy elektoratpen jumys isteýge niettenip otyr.
"Verstka" basylymy da jýyrda Kreml 2024 jylǵy prezident sailaýyna daiyndyqtyń jańa fazasyna ótti dep habarlaǵan. Aimaq basshylaryna aldaǵy ýaqytta sheshilýi tiis turǵyndar úshin eń mańyzdy máselelerdiń tizimin jasaýdy tapsyrǵan. Buǵan qosa, "áleýmettik jelidegi kóńil-kúidi baǵalap, olardy jaqsartýdy" tapsyrǵan. Pýtinnen bólek, sailaýǵa qatysatyn tulǵalar memlekettik dýmadaǵy partiialardan shyǵarylýy múmkin dep aitylady. Olardyń barlyǵy soǵysty qoldaidy.
"Verstka" basylymy sonymen birge qupiia derekkózderge súiene otyryp, Kreml qyrkúiektegi sailaý aldynda aimaq basshylaryna Ýkrainada soǵys júrip jatqan aimaqqa baryp qaitý jóninde nusqaýlyq túsken. Mundai keńes sailaýǵa túsetin aimaq basshylaryna aitylǵan.
Copyright (c) 2013. RFE/RL, Inc. Reprinted with the permission of Radio Free Europe/Radio Liberty, 1201 Connecticut Ave., N.W. Washington DC 20036.
