Elordada bir top kópbalaly ana kredittiń 300 teńgesin keshirý máselesi boiynsha aryzdandy. Eńbek jáne halyqty áleýmettik qorǵaý ministrligi osy máselege qatysty túsinikteme berdi, dep habarlaidy Sputnik Qazaqstan.
Vitse-ministr Svetlana Jaqypovanyń aitýynsha, shaǵymdanyp jatqan azamattardyń ishinde tizimge engenderi bar. Biraq kreditteri ótelmei jatyr.
"Birinshiden, kredit kollektorlyq kompaniiaǵa ótip ketse, ol kisilerdiń boryshy ótelmeidi. Sosyn bizge kelip jatqan analardyń ishinde kreditti 1 maýsymnan keiin alǵandar da bar. Al jarlyq shyqqannan keiin alynǵan kreditter óteýge jatpaidy", - dedi Jaqypova astanada ótken baspasóz máslihatynda.
Onyń sózine qaraǵanda, tizimde turǵan adamnyń krediti ótelmei jatsa, basqa da sebepter bar. Atap aitqanda, tiisti qujattar aqparattyq bazada tirkelmei turýy múmkin. Al krediti óteletin azamattardyń tizimi sol aqparattyq bazalarda kórsetilgen málimettiń negizinde jasalady.
"Birinshi sebep, neke qiiý týraly kýálikter bazada tirkelmegen bolyp shyǵady. Sol sebepti biz ondai azamattardy ádilet ministrliginiń aqparattyq júiesine tirkeýge jiberemiz. Olar AHAJ bólimderi arqyly óz málimetterin tirkeidi. Ekinshi sebep, asyraýshysynan aiyrylǵan azamattardyń málimetteri bolmai shyǵady. Olardy da ádilet ministrligine jiberip otyramyz", - dep atap ótti Jaqypova.
Budan bólek, kópbalaly otbasynyń balalary joǵary oqý ornynda bilim alyp jatqany týraly málimettiń bolmaýy da kredittiń ótelmei jatqanyna sebep bolady. Bilim jáne ǵylym ministrliginiń aqparattyq bazasynda asyraýshysynan aiyrylǵan balalar týraly málimet te az. Ondaida osy ministrlikke baryp, tiisti jeke málimetti bazaǵa engizý kerek. Sosyn balanyń týý týraly málimetteri de aqparattyq bazada jii tirkelmei qalady. Al aqparattyq bazada onyń málimeti shyqpasa, kópbalaly otbasynyń quramyna kiredi dep kórsetilmeidi. Ondai otbasynyń krediti de ótelmeidi.
Aita keteiik, prezidenttiń jarlyǵyna sáikes, kredittiń 300 myń teńgesi men oǵan jazylǵan ósimpuldardy keshirýdiń naqty talaptary bar. Qaryzdyń jalpy somasy 3 millionnan aspaýy kerek. Al qaryzy keshiriletin azamattardyń qataryna kópbalaly otbasylar, múgedek balasy bar otbasylar, asyrýshysynan aiyrylǵandar jáne ataýly áleýmettik kómekti alatyndar kiredi.
Búginde krediti keshiriletin adamdardyń tizimi elektrondy úkimet portalynda bar. Sol jerde elektrondy-tsifrlyq qoltańba arqyly kez kelgen adam tizimde bar-joǵyn teksere alady. Sondai-aq "111" bailanys ortalyǵyna habarlasyp, qajetti aqyl-keńesti alýǵa múmkindik bar.
