BAQ-ta taraǵan kredit raqymshylyǵyn uzartý týraly aqparat shyndyqqa janaspaidy. Bul jóninde Eńbek jáne halyqty áleýmettik qorǵaý ministrligi málim etti, dep habarlaidy "Ult aqparat".
Qazaqstanda azamattar úshin «kredittik raqymshylyqty» uzartý josparlanyp otyrǵany týraly birqatar BAQ-taǵy jariialanymdar jýrnalisterdiń «Ashyq derekter» portalynda ornalastyrylǵan QR Úkimeti qaýlysynyń jobasyn durys túsindirmeýine negizdelgen jáne shyndyqqa sáikes kelmeidi.
Memleket basshysynyń 2019 jylǵy 26 maýsymdaǵy «Qazaqstan Respýblikasy azamattarynyń borysh júktemesin azaitý sharalary týraly» Jarlyǵyn oryndaý úshin «Qazaqstan Respýblikasy azamattarynyń borysh júktemesin azaitýǵa arnalǵan qarajatty paidalanýdyń keibir máseleleri týraly» Qazaqstan Respýblikasy Úkimetiniń 2019 jylǵy 15 shildedegi qaýlysy qabyldanǵany belgili.
Qaýlymen esepten shyǵarý merzimi 2019 jylǵy 13 jeltoqsannan keshiktirilmei belgilengen.
QR azamattarynyń borysh júktemesin azaitý úsh kezeńde júrgizildi.
Birinshi kezeńde esepten shyǵarý 2019 jyldyń qyrkúieginde 507,4 myń azamatqa jalpy somasy 105,2 mlrd teńgege, ekinshi kezeńde 2019 jylǵy jeltoqsanda 46,9 myń azamatqa jalpy somasy 9,8 mlrd teńgege júzege asyryldy.
Jarlyqqa qatysy bar adamdardy tolyq qamtý maqsatynda Ministrlik 2020 jyldyń sáýir aiynda jalpy somasy 5,5 mlrd.teńgege 23,4 myń azamatty úshinshi kezeńde esepten shyǵarýdy júzege asyrdy.
Osyǵan bailanysty QR Eńbek jáne halyqty áleýmettik qorǵaý ministrligi 2020 jyldyń I toqsanynda naqty júrgizilgen jumystardy eskere otyryp, esepten shyǵarý merzimin túzetýdi kózdeitin «Qazaqstan Respýblikasy Úkimetiniń 2019 jylǵy 15 shildedegi «Qazaqstan Respýblikasy azamattarynyń borysh júktemesin azaitýǵa arnalǵan qarajatty paidalanýdyń keibir máseleleri týraly» qaýlysyna ózgerister engizý týraly» QR Úkimeti qaýlysynyń jobasyn ázirledi.
Búgingi kúni bereshekti esepten shyǵarý boiynsha barlyq jumys aiaqtaldy jáne olardy qaita bastaý boljanyp otyrǵan joq.
