Nur-Sultan qalasy ákimdiginiń baspasóz qyzmeti turǵyn úige krannyń qulaýyna qatysty tekserý júrip jatqanyn málim etti, dep habarlaidy QazAqparat.
«Nur-Sultan qalasynyń qalalyq orta sapasy jáne baqylaý basqarmasynyń eńbek inspektsiiasy avtokrandy tekserip, qorytyndysynda júk kóterý mehanizmin iske asyrýda ónerkásiptik qaýipsizdik erejeleri buzylǵanyn anyqtady. Atalǵan oqiǵany tergeý qorytyndysyna sáikes merdigerge Qazaqstan zańy boiynsha shara qoldanylady. Oqiǵa bolǵan jerge qalalyq qyzmetter: Ónerkásiptik qaýipsizdik departamenti, «Esil» aýdany ákimi apparaty, «Nur-Sultan qalasy Qalalyq orta sapasy jáne baqylaý basqarmasy» mamandary bardy», - dep jazylǵan ákimdik málimetinde.
Resmi aqparat boiynsha, arnaiy qurylǵan jumys toby qalanyń qurylys obektilerindegi 121 munaraly krandy teksergen.
«Tekserý qorytyndysynda 81 krannyń jumysynan ereje buzý faktileri anyqtaldy. Munaraly krandardyń tehnikalyq qujattamasynyń bolmaýy ereje buzýǵa negizgi sebep bolyp otyr. Atalǵan munaraly krandardyń jumysy kemshilikter qalpyna kelgenshe toqtatyldy», - dep jazady ákimdiktiń baspasóz qyzmeti.
