QR Ulttyq ulany Bas qolbasshylyǵynyń jáne elordadaǵy 5573 áskeri bóliminiń jeke quramy attestatsiialyq synaq tapsyrýdy bastady, dep habarlaidy "Ult aqparat".
«Ulttyq ulandaǵy bul synaqtar - jaýyngerlik qyzmet sapasyn arttyrýdy, bilikti mamandardan tolyqqandy kadrlyq rezerv qurýdy, ár áskeri qyzmetshiniń iskerlik, tulǵalyq jáne jeke qasietterin jan-jaqty ári ádil baǵalaýdy, olardyń kvalifikatsiialyq talaptar men óz laýazymyna sáikestigin anyqtaýdy kózdeidi. Attestatsiianyń alǵashqy kúninde Bas qolbasshylyqtyń ofitserleri men kelisimshart boiynsha áskeri qyzmetshiler elorda syrtyndaǵy «Qaptaǵai» oqý ortalyǵynda atý sheberlikterin kórsetti. Sondai-aq, Bas qolbasshylyqtyń sport zalynda túrli normativter boiynsha sporttyq daiyndyqtary da synaldy. Táýliktiń ekinshi jartysynda ulandyqtar Áskerdi basqarý ortalyǵynda basshylyq qujattar boiynsha bilimderin kórsetý úshin test tapsyrdy», - delingen QR Ulttyq ulany baspasóz qyzmetiniń aqparatynda.
Attestatsiia úsh kúnge sozylmaq. Aldaǵy kúnderi jetekshi psiholog-mamandar Bas qolbasshylyqta qyzmet atqaratyndardyń jaýyngerlik mindetterdi oryndaýǵa psihologiialyq turǵydan daiyndyǵyn tekseredi. Budan bólek, Qazaqstan Respýblikasynyń Konstitýtsiiasy men zańnamalarnan da arnaiy testter tapsyrylady.
Eske salaiyq, QR Tuńǵysh Prezidenti Nursultan Nazarbaev 2018 jylǵy 5 qazandaǵy Joldaýynda quqyqqorǵaý organdarynyń qyzmetkerlerin attestatsiiadan ótkizýdi mindettegen bolatyn. Al taiaýda ótken QR IIM-niń alqa otyrysynda Prezident Qasym-Jomart Toqaev quqyqqorǵaý organdaryndaǵy reformalyq jumystardy jalǵastyrýdy tapsyrdy.
