QR Ulttyq Olimpiada komitetiniń bas hatshysy Sáken Musaibekov QR «Pencak Silat» qaýymdastyǵynyń prezidenti Gadji Gadjievke, qaýymdastyq vitse-prezidenti Medet Ábjanovtyń jáne t.b. qatysýymen jaýyngerlik ónerdiń jańa túrin moiyndaý týraly sertifikat tapsyrdy, dep habarlaidy "Ult aqparat".
Penchak silat (Pencak Silat) - Indoneziia, Malaiziia, Singapýr jáne Brýnei elderi kiretin indoneziia-malai arhipelagynyń baiyrǵy halyqtary qoldanǵan jaýyngerlik óner túri. Bul sport túri indoneziia jáne malai halyqtarynyń tarihy men mádenietinde mańyzdy ról atqarady. Aita ketý kerek, sońǵy jyldary Penchak silat Ońtústik-Shyǵys Aziianyń aýmaǵynan shyǵyp, Gollandiia, Germaniia, Italiia, AQSh pen Japoniia siiaqty kóptegen elderde keń tarady. Qazir jaýyngerlik ónerdiń bul túrin 70-ten astam el sport retinde qoldanady. Al dástúrli Silat 140-tan astam elde ózin-ózi qorǵaý óneri retinde tanymal. Keibir elderdiń Qarýly kúshteri Penchak silatty ózin-ózi qorǵaýǵa arnalǵan bazalyq sport retinde qoldanady.
«Penchak silat - qaýipsiz sport túrleriniń biri. Óitkeni onyń quramyna kiretin úsh urys túri eshqandai janasýdy qajet etpeidi. Iaǵni bul túrlermen balalar da, qyzdar da alańsyz ainalysa alady», - deidi qaýymdastyqtyń vitse-prezidenti Talǵat Qaliev.
Búginde Nur-Sultan, Almaty, Shymkent, Aqtóbe, Pavlodar, Qaraǵandy, Qostanai, Atyraý qalalarynda jáne Jambyl, Almaty oblystarynda Penchak silat qaýymdastyǵynyń filialdary qurylǵan.
«Keleshekte bes óńirde filialdar ashýdy josparlap otyrmyz. Ulttyq Olimpiada komiteti bizdiń uiymdy qaýymdastyq retinde tirkedi. Qarasha aiynda Penchak silat boiynsha birinshi respýblikalyq chempionat ótkizýdi josparlap otyrmyz. Al jeltoqsan aiynda Aziia chempionaty ótedi. Respýblikalyq chempionattyń jeńimpazdary sol jarysqa joldama alady», - dedi «Pencak Silat» qaýymdastyǵynyń prezidenti Gadji Gadjiev.
Onyń aitýynsha, qazirdiń ózinde qazaqstandyq sportshylar bul sport túrinen medalder jeńip alýda. Biyl naýryz aiynda Ortalyq Aziianyń ashyq týrnirinde qazaqstandyq komanda 3 kúmis, 10 qola medal jeńip alsa, úsh aidan keiin 2 altyn, 3 kúmis jáne bir qola júldeni jeńip aldy. Sonymen qatar, qyrkúiek aiynyń basynda Ońtústik Koreiada ótken Búkilálemdik jaýyngerlik óner oiyndarynda Qazaqstan qorjynyna 2 qola medal túsken.
Qaýymdastyq ókilderi jyl sońyna deiin taǵy birneshe jarysqa qatysý josparda turǵanyn aitady. Tailandta 30 qyrkúiek pen 5 qazan aralyǵynda ótetin Aziia jaǵajai oiyndaryna qazaqstandyq Penchak silat ókilderi de qatysady. Sonymen qatar, Qazaqstan komandasy jeltoqsan aiynda Penchak silattan Qytaida ótetin besinshi Aziia chempionatyna daiyndalýda.
