Ekinshi deńgeili bankter qarjysy tolyǵymen tólenbegen úidi óz boryshkerlerine jalǵa beretin bolady. Bul týraly dóńgelek ústel otyrysynda Ulttyq banktiń syrtqy kommýnikatsiialar jáne qarjy máseleleri boiynsha tutynýshylar quqyqtaryn qorǵaý jónindegi departament direktory Aleksandr Terentev málimdedi, dep habarlaidy QazAqparat tilshisi.
Ipoteka boiynsha boryshkerlerdiń qaryzdaryn qaita qarjylandyrý baǵdarlamasyn júzege asyrý barysynda QR Ulttyq banki ekinshi deńgeili bankterdiń aldyndaǵy óz boryshtaryn ótei almaityndardyń kórsetkishi jalpy aryzdanǵandardyń 15-20 paiyzyn quraitynyn anyqtady.
Departament usynǵan aqparatqa sai, baǵdarlama talaptary boiynsha boryshkerler aryzy qaralyp jatyr. 2016 jyldyń 1 qańtaryna deiingi aryzdarǵa Ulttyq bank qurǵan arnaiy komissiia taldaý jasap, áleýmettik jaǵdaiyna bailanysty bank aldyndaǵy boryshyn ótei almaityn azamattar reti anyqtaldy. Olar ekinshi kezeńde ipoteka kelisimi boiynsha tóleýge tiis paiyzdyq mólsherlemelerinen tolyǵymen arylady. Naqtyraq aitar bolsaq, ekinshi deńgeili banktiń ipotekaǵa qoiǵan ústemeaqysy baǵdarlama aiasynda joiylady. Al ipoteka tólemi teńgeniń qunsyzdanýyna deiingi, iaǵni 2015 jyldyń 18 tamyzy kúngi valiýta baǵamy boiynsha anyqtalady.
«Úshinshi kezeńde, ekinshi deńgeili bankter qarjysy tolyǵymen tólenbegen úidi óz boryshkerlerine naqty belgilengen soma boiynsha jalǵa berý quqyǵyna ie bolady. Bul - ipotekasyn tólei almaityn azamattarǵa usynylatyn sońǵy múmkindik. Munda ár boryshkerdiń ipotekasy jeke qaralady, iaǵni olardyń tóleýge mindetti somasy ártúrli bolýy múmkin. Osylai belgili bir ýaqyttan keiin boryshkerler tek úidiń baǵasyn ǵana tólep, óz ipotekasyn jabady», - deidi Aleksandr Terentev.
Onyń aitýynsha, áleýmettik jaǵdaiy ipotekalyq mindetin oryndaýǵa jetip tursa da, tóleýden ártúrli sebeptermen jaltarýǵa tyrysyp jatqan azamattar da bar. Olardy arnaiy qurylǵan komissiia anyqtap, baǵdarlamadan shettetedi.
Aita ketsek, ipoteka boiynsha boryshkerlerdiń qaryzdaryn qaita qarjylandyrý baǵdarlamasy Elbasy úndeýimen 2015 jyldyń sáýir aiynan óz jumysyn bastady. Baǵdarlamaǵa Ulttyq Bank esebinen 300 milliard teńgege deiin qarjy jumsalady.
Qaita qarjylandyrý baǵdarlamasy aǵymdaǵy jyldyń 30 jeltoqsanyna deiin júrgiziledi. Al boryshkerler qaita qarjylandyrý ótinishterin ekinshi deńgeili bankterge 2018 jyldyń 15 jeltoqsanyna deiin ótkizýleri tiis.
