QR Ulttyq qaýipsizdik komiteti kópkezeńdi arnaiy operatsiia ótkizdi. Onyń barysynda esirtki saýdasymen ainalysatyn toptyń qylmystyq áreketiniń joly kesilip, 97 kg marihýana tárkilendi, dep habarlaidy "Ult aqparat".
«Atalǵan fakti boiynsha QR UQK Almaty qalasy boiynsha departamentinde QR QK-niń 297-baby 3-bóligi boiynsha qylmystyq is qozǵaldy. Ustalǵan tulǵalar qazirgi tańda tergeý izoliatoryna qamaldy. Sotqa deiingi tergep-tekserý amaldary júrgizilýde», - delingen UQK aqparatynda.
Vedomstvodan málim etkendei, 2018 jyly UQK Almaty qalasy aýmaǵynda esirtkiniń zańsyz ainalymyna qatysty 14 faktini, halyqaralyq deńgeidegi zańsyz ainalym boiynsha 5 faktini anyqtady.
«Nátijesinde, 36 qylmystyq is qozǵaldy. Zańsyz ainalymnan 84 kg esirtki jáne júikege áser etetin zattar, onyń ishinde 74 kg geroin jáne 8 kg sintetikalyq esirtki zattary tárkilendi. Esirtkini kontrabandalyq jolmen zańsyz tasymaldaý, sondai-aq ultaralyq qylmystyq toptarǵa qatysý faktileri boiynsha 12 adam ustaldy. Onyń ishinde eki sheteldik azamat qylmystyq jaýapkershilikke tartyldy», - dedi baspasóz qyzmetinen.
Atap ótilgendei, esirtki zattary Qazaqstan aýmaǵyna kontrabandalyq jolmen Eýroodaq, Resei, AQSh, Meksika jáne Qytai elderinen halyqaralyq poshta jóneltilimderi jáne logistikalyq kompaniialar arqyly keledi.
«Ótken jyly sheteldik seriktestiktermen birge 3 halyqaralyq operatsiia ótkizildi. Zańsyz ainalymnan 1056 MDMA tabletkasy jáne 0,2 kg sintetikalyq esirtki zaty tárkilendi. Júikege áser etetin esirtki zatyn jasyryn zerthanalarda daiyndaityn jáne olardy internet-resýrstar arqyly taratýmen ainalysatyn qylmystyq toptyń is-áreketine tosqaýyl qoiyldy. Zańsyz ainalymnan 5 gk astam sintetikalyq esirtki zaty jáne 500 kg himiialyq qospa tárkilendi», - dedi QR UQK-dan.
