QR UQK tóraǵasynyń orynbasary Nurǵali Bilisbekov arnaiy qyzmettegilerdiń Sankt-Peterbýrgtegi teraktige DAISh (Qazaqstanda tyiym salynǵan) ókilderiniń qatysy bolýy múmkin degen nusqany tekserip jatqanyn aitty, - dep habarlaidy kaz.tengrinews.kz.
Nurǵali Bilisbekov ázirshe DAISh-tyń teraktige qatysy bar ekeni jaily málimettiń joq ekenin, biraq bul nusqany da qarastyrý kerektigin aitty.
"DAISh - terrorlyq uiym. Olardyń maqsaty - kez kelgen zorlyq-zombylyq mazmuny bar oqiǵalardy óz moinyna alyp, al rasynda ózderiniń bedelin arttyrý. Biraq mundai málimet árdaiym shyndyqqa janaspaidy. Biraq bul jaǵdaida men bul máseleni joqqa shyǵarmaimyn. Sebebi tergeý nusqasy DAISh-tyń osy teraktige qatysy bolýy múmkin ekenin kórsetedi", - dep túsindirdi UQK tóraǵasy.
Onyń aitýynsha, DAISh uiymynda birneshe úlken ári shaǵyn uiym bar. "Sondyqtan da árbir málimet muqiiat qaralatyn bolady. Ázirshe birde-bir uiym teraktini óz moinyna almady", - dedi Nurǵali Bilisbekov.
Osyǵan deiin Qazaqstannyń Ulttyq qaýipsizdik komiteti tóraǵasynyń orynbasary Nurǵali Bilisbekov qazaqstandyq stýdenttiń Sankt-Peterbýrgte terakt uiymdastyrǵan lańkes retinde qarastyrylmaitynyn aitqan bolatyn. Sondai-aq, Bilisbekov RF Bas prokýratýrasy Máskeý ýaqytymen 16:30-da metrodaǵy jarylysty terrorlyq akt dep resmi túrde jariialaǵanyn aitty.
Aita keteiik, búgin QR SIM Sankt-Peterbýrgte jarylysty qazaqstandyq uiymdastyrýy múmkin degen jaǵdaiǵa qatysty túsinik bergen bolatyn. "Túsindirip ótkim keledi. 3 sáýirde jergilikti ýaqyt boiynsha saǵat 21.06-da Sankt-Peterbýrgtegi Qazaqstannyń Bas konsýlyna Almatydan Irina Aryshevadan qońyraý kelip tústi. Ol onda jarylys týraly málimetterden keiin onyń 20 jastaǵy uly, Sankt-Peterbýrgtegi Ekonomikalyq ýniversitettiń 3-kýrs stýdenti Maksim Aryshevtyń bailanysqa shyqpai jatqanyn aitty", - degen edi SIM baspasóz qyzmetiniń basshysy Ánýar Jainaqov.
Aldyn ala málimetter boiynsha, Sankt-Peterbýrgte metroda bolǵan jarylystan kem degende 10 adam qaza tapty, zardap shekkender sany 43-ke jetti.
Jarylys metronyń eki beketinde bolǵan - "Sennaia ploshad" jáne "Tehnologicheskii institýt". Eki jarylystan zardap shekkender arasynda balalardyń bary da anyqtalǵan. Qutqarýshylar jolaýshylardy evakýatsiialap jatyr. Sonymen qatar qazirgi ýaqytta metro beketterine kirý jáne shyǵý joldary jabylǵan.
"Zardap shekkender men qaza tapqandardyń jaqyndary men týystaryna kóńil aitamyn. Men arnaiy qyzmet ókilderiniń basshylarymen sóilestim. Federaldy qaýipsizdik qyzmetiniń direktorymen sóilestim. Quqyq qorǵaý organdary men arnaiy qyzmet ókilderi oqiǵanyń egjei-tegjeili zerttep, dál baǵasyn beredi. Qala biligi, eger qajet bolyp jatsa federaldyq bilik qaza bolǵandar men zardap shekkenderdiń otbasyna qajetti kómek kórsetedi", - degen edi Pýtin Belarýs prezidenti Aleksandr Lýkashenkomen kezdesý barysynda.
