QR Premer-Ministri Asqar Maminniń tóraǵalyǵymen ótken Úkimet otyrysy kezinde elimizdiń 2024 jylǵa deiingi áleýmettik-ekonomikalyq damý boljamynyń jobasy, sondai-aq 2020–2022 jyldarǵa arnalǵan respýblikalyq biýdjet týraly, 2020–2022 jyldarǵa arnalǵan respýblikalyq jáne oblystyq biýdjetter arasyndaǵy jalpy sipattaǵy transfertter kólemi týraly jáne Ulttyq qordan kepildendirilgen transfert týraly zań jobalary maquldandy.
Zań jobalaryn QR Premer-Ministriniń birinshi orynbasary – qarjy ministri Á. Smaiylov, QR ulttyq ekonomika ministri R. Dálenov tanystyrdy. Sondai-aq, kún tártibindegi másele boiynsha QR Ulttyq Bankiniń Tóraǵasy E. Dosaev sóz sóiledi.
2020–2024 jyldarǵa arnalǵan Qazaqstannyń áleýmettik-ekonomikalyq damý boljamyna sáikes QR JIÓ-niń naqty ósimi 2020 jyly 4,1%, keiinnen 2024 jyly 4,7%-ǵa deiin ósedi dep boljanǵan. JIÓ-niń ortasha jyldyq ósý qarqyny aldaǵy boljanatyn kezeńde 4,4%-dy quraidy.
Respýblikalyq biýdjet jobasynda 2020 jylǵa arnalǵan túsimder osy jyldyń josparyna 639 mlrd teńge ósimmen 11,2 trln teńgeni quraidy. 2020–2022 jyldarǵa arnalǵan respýblikalyq biýdjet shyǵystarynyń basymdyqtary Memleket basshysynyń Qazaqstan halqyna jyl saiynǵy joldaýlary men QR Tuńǵysh Prezidenti – Elbasynyń jariialanǵan bastamalaryn odan ári iske asyrýǵa baǵyttalatyn bolady.
Turǵyndardyń turmys sapasy men ál-aýqatyn odan ári arttyrý birinshi kezektegi baǵyttary bolyp qalyp otyr. 2020 jylǵa arnalǵan áleýmettik sala shyǵystary biylǵy shyǵys kóleminen 303 mlrd teńgege ósimmen 5,7 trln teńge kóleminde josparlanyp otyr.
QR Premer-Ministri Asqar Mamin 2020–2022 jyldarǵa arnalǵan jalpy sipattaǵy transfertterdiń kólemin aiqyndaý kezinde árbir óńirdiń erekshelikteri jáne olardyń ekonomikalyq damý deńgeileri eskerilgenin atap ótti.
«Respýblikalyq biýdjette kózdelgen qarajat memlekettiń barlyq áleýmettik mindettemelerin tolyq kólemde oryndaýǵa múmkindik beredi», — dedi Asqar Mamin.
Sonymen qatar, biýdjet shyǵystary ekonomikanyń naqty sektoryn qoldaýǵa, onyń ishinde indýstriialyq-innovatsiialyq damýǵa, turǵyn úi jáne kólik infraqurylymyna, agroónerkásiptik keshenge, tsifrlandyrýǵa, ónimdi jumyspen qamtýǵa baǵyttalatyn bolady.
«Óńirlerdiń ákimderi biýdjet qarajattaryn jumsaý kezinde belgilengen baǵyttardy ustanýy qajet», — dep atap aitty A. Mamin.
Atalǵan zań jobalary Memleket basshysymen kelisilgen jáne belgilengen tártippen Respýblikalyq biýdjet komissiiasymen maquldanǵan. Ministrler kabinetiniń qaraýynyń qorytyndysy boiynsha jobalar QR Parlamenti Májilisine jiberiletin bolady.
