Qazaqstan diplomattary shetelde bes jyldan artyq jumys istemeidi. Bul týraly Senattyń Halyqaralyq qatynastar, qorǵanys jáne qaýipsizdik komitetiniń keńeitilgen otyrysynda málim boldy, dep habarlaidy QazAqparat.
«Elshilerdiń shetelde bolý merzimin 5 jyldan arttyrmaý máselesi ózekti bolyp otyr, sebebi qazirgi kezde 20 jyldan astam ýaqyt boiy elge oralmaǵan elshiler, diplomattar bar. Olar elden qarym-qatynasyn úzgen dep aitýǵa bolmaidy, degenmen de sony nasharlatqan, eldegi jaǵdaidy tereń túsinbeidi. Olardy bes jyl kóleminde elge qaitaryp, ártúrli deńgeide jumys berip, sodan keiin qaitadan diplomatiialyq saladaǵy qyzmetke baǵyttaý týraly usynystar bolyp jatyr. Sondyqtan bul zań jobasy jalpy diplomatiialyq jumystyń dárejesin, onyń tiimdiligin arttyrýǵa úlken áserin beredi degen oidamyz», - dedi Ikram Adyrbekov «Qazaqstan Respýblikasynyń diplomatiialyq qyzmeti týraly» Qazaqstan Respýblikasynyń Zańyna ózgerister men tolyqtyrýlar engizý týraly» zań jobasyn talqylaý barysynda.
Óz kezeginde QR Syrtqy ister ministrliginiń jaýapty hatshy Anarbek Qarashev diplomattar elge tiisti merzimde elge qaityp oralǵany durys ekenin atap ótti.
«Balalar qazaq ekenin bilmei ketedi. Men 12 jyl bolǵan joqpyn. Balalarymda týǵan eli týraly durys tanymy bolmady. Elge kelip, úsh jyldan keiin balalar qazaq ekenderin sezip otyr, iaǵni osynda mektepke baryp, qazaqsha sóilep, qai memlekettiń balasy ekenin túsine bastady. Sondyqtan diplomattar úzdiksiz shetelde qyzmet ete berse, olardyń balalary Qazaqstan jaiynda tek BAQ arqyly ǵana bilip júredi»,-dep atap ótti A. Qarashev.
