Qazaqstannyń Syrtqy ister ministrligi "Vecher s Vladimirom Solovevym" baǵdarlamasynyń 2 shildedegi shyǵarylymynda aitylǵan sózderge túsinik berdi, - dep habarlaidy Tengrinews.kz tilshisi. Tok-shoýda júrgizýshi men qatysýshylar "Kaspiide AQSh áskeri bazalary ornalastyrylǵan" degen qaýesetti aityp, buǵan teris pikir bildirgen.
"Mundai pikirlerge reseilik BAQ ókilderi men sarapshylardyń naqty málimeti joq bolǵandyǵy sebep sekildi. Al naqty derek mynadai - munda másele Qazaqstan aýmaǵynan ótetin amerikalyq ushpaityn kommertsiialyq temirjol tranzitinde bolyp otyr. Bul tranzit Aýǵanstan úkimetine qoldaý kórsetýge arnalǵan halyqaralyq operatsiialar úshin qajet", - dep pikir bildirdi SIM ókilderi.
Vedomstvo ókilderiniń aitýynsha, tasymal jabyq konteinerlermen toqtaýsyz qazaqstandyq ulttyq kompaniianyń árdaiymǵy baqylaýymen júrgizilýi tiis.
"Kaspiide eshqandai da áskeri baza joq. Qaitalap aitamyz, tranzit áskeri emes júkter úshin ǵana qoldanylady. Tranzit úshin Qazaqstan territoriiasy ǵana emes, AQSh-tan Aýǵanstanǵa deiingi aralyqty jalǵaityn basqa da elderdiń aýmaǵy qoldanylady", - dedi vedomstvodaǵylar.
QR SIM málimetinshe, mundai tranzit reseilik taraptyń da aýmaǵynan ótken.
"2010-2015 jyldar aralyǵynda dál osy júk tranziti Resei, Qazaqstan, Ózbekstan aýmaǵy arqyly Soltústik úlestirý júiesi sharttaryna sáikes júrgizilgen. Qazaqstan territoriiasynan ótetin amerikalyq osy kommertsiialyq temirjol tranziti 2010 jyly bekitilgen. Tranzit reseilik-amerikalyq kelisimdegi sharttarmen birdei. 2017 jyldyń qyrkúieginde osy atalǵan kelisimniń hattamasyna qol qoia otyryp, biz Aqtaý men Quryq porttaryndaǵy ótkizý pýnktteriniń tizimin ǵana qostyq. Hattama mazmuny RF men AQSh arasynda qarastyrylǵan shartpen birdei. Munda másele amerikalyq áskeri bazalardy nemese qandai da bir basqa memlekettik áskeri bazalardy Kaspiide ornalastyrý jaiynda emes", - dedi syrtqy saiasi vedomstvodaǵylar.
Baspasóz qyzmetindegiler qujatty bekitý aldynda Qazaqstannyń óz seriktesterimen, birinshi kezekte reseilik SIM-degi áriptesterimen konsýltatsiia ótkizgenin aityp otyr.
"Qazaqstan Ujymdyq qaýipsizdik týraly shart uiymy aiasyndaǵy óz mindettemelerine turaqty jáne tolyqtai jaýapkershilikpen qaraidy. Bul batys elderine de, onyń ishinde AQSh-qa da málim", - dedi vedomstvodaǵylar.
Sóz sońynda ministrliktegiler "Máskeý men Vashington arasynda konstrýktiv dialog pen senimniń qalpyna kelýine múddeli" ekenin málimdedi.
