QR SIM Saýd Arabiiasynyń týristik viza berýdi toqtatýyna bailanysty túsinik berdi, dep habarlaidy "Ult aqparat".
QR Syrtqy ister ministrligi Taiaý, Orta Shyǵys jáne Afrika departamentiniń direktory Erjan Muqash Saýd Arabiiasy Koroldiginiń Qazaqstandaǵy Elshisi Abdýlaziz ben Abdýlla Ál-Daýdpen kezdesti.
Kezdesý barysynda ekijaqty yntymaqtastyqtyń ózekti máseleleri, onyń ishinde Qazaqstan men Saýd Arabiiasy arasyndaǵy saýda-ekonomikalyq jáne mádeni-gýmanitarlyq bailanystardy damytý máseleleri talqylandy.
Elshi Saýd Arabiiasy biliginiń birqatar elderdiń azamattary úshin elektrondyq týristik vizalardy berýdi ýaqytsha toqtatý jónindegi taiaýdaǵy sheshimi týraly máselege túsinikteme berdi.
«A. Ál-Daýd ýmra jasaý úshin qajylyq vizalardy, sondai-aq týristik vizalardy berý búkil álem boiynsha koronavirýs indetiniń keń taralýyna bailanysty toqtatylǵanyn rastaǵan. Bul shara ýaqytsha jáne Koroldikke keletin álemniń barlyq musylmandaryn qorǵaýǵa baǵyttalǵan. Sonymen qatar ol vizanyń iskerlik jáne basqa da túrlerin berý toqtamaǵanyn jetkizdi», - delingen habarlamada.
Saýd Elshisiniń aitýynsha, azamattarǵa kirý toqtatylǵan memleketterdiń tizimi álemde koronavirýstyń taralýy boiynsha jaǵdaidyń ózgerýine bailanysty jańartylyp turady. Sonymen qatar bul tizimge Qazaqstanmen qatar Ortalyq Aziianyń basqa da elderi engizilgen.
Kezdesý qorytyndysy boiynsha taraptar koronavirýstyń taralýyna bailanysty óz elderindegi epidemiologiialyq jaǵdai boiynsha ózekti aqparatpen almasýǵa ýaǵdalasty.
