Qytaidyń eski zaýyttary Qazaqstanǵa ákelinedi degen aqparat – jai ǵana qaýeset. Syrtqy ister ministriniń orynbasary Ermek Kósherbaev osylai dep málimdedi, dep habarlaidy QazAqparat.
«Qytai bizde investorlardyń tiziminde birinshi memleket emes. Ózderińiz biletindei, alǵashqy oryndarda Niderlandy (egemendik alǵaly beri 87 mlrd dollar investitsiia tartylǵan) tur. Ekinshi orynda AQSh (37 mlrd dollar), odan keiin Shveitsariia (23 mlrd dollar), Qytai (17 mlrd dollar), Frantsiia (15 mlrd) ornalasqan. Qazaqstan men Qytai Úkimetteri arasynda birlesken komissiia bar. Sol komissiia boiynsha yntymaqtastyq jóninde birikken baǵdarlamany qurǵanbyz. Osyndai baǵdarlamany basqa eldermen de daiyndadyq. Búkil álemde saýda soǵysy júrip, sanktsiialar kóbeiip ketti. Mundai jaǵdaida investorlar tynyshtyq izdeidi. Olar árine, qaýipti jerge baryp aqshasyn salmaidy. Tiisti jaǵdai uiymdastyratyn elderge baryp investitsiialaryn salady. Bizdiń aldymyzdaǵy maqsat – Qazaqstanda osyndai jaǵdai jasap, investitsiia tartý jumysyn ary qarai jalǵastyrý», - dedi Ermek Kósherbaev OKQ-da ótken baspasóz máslihatynda.
Sonymen birge Syrtqy ister vitse-ministri «Qytai elinen 55 eski zaýyt Qazaqstanǵa kóshiriledi-mys» degen áleýmettik jelilerde taraǵan áńgimege qatysty jaýap berdi.
«55 zaýyt degen baǵdarlama da joq. Kezinde estigenim: blogerlar nemese vatsaptaǵy rolikterde 55 eski zaýyt degen áńgime bar eken. Resmi túrde aitarymyz – ondai baǵdarlama joq, eski zaýyttardy eshkim ákelmeidi. Barlyq jobalardy ózimiz tańdap, tiisti memlekettik saraptamadan ótkizemiz. Ol jobalardy jekemenshik kásipkerler atqarady. Eski zattardy eshkim almaidy. Bizdiń elge ákelmeidi. Eger ondai oi bolsa, bizdiń komissiia árine, oǵan tyiym salady. Tizimdegi 55 joba degen – ol zaýyttarǵa jatpaidy. Jylyna eki ret qytailarmen komissiia otyrysyn ótkizemiz. Ár jobanyń tiisti jaǵdaiy, qandai qiyndyqtary bar – talqylaimyz. Eski zaýyttar joq», - dedi Ermek Kósherbaev.
