Qazaqstannyń Syrtqy ister ministrligi respýblika territoriiasynda ustalǵan Qyrǵyzstan azamattaryna, onyń ishinde Joǵarǵy Keńestiń (Qyrǵyzstan parlamenti) depýtaty Asylbekuly Damirbekke qatysty aqparatqa pikir bildirdi.
"Qazaqstan Syrtqy ister ministrliginiń konsýldyq qyzmet departamenti 2018 jyly 16 aqpanda Astanadaǵy Qyrǵyzstan Respýblikasynyń elshiligine Qazaqstanda Qyrǵyzstan Respýblikasy azamattarynyń ustalǵanyn resmi túrde habarlady. Ol 1963 jylǵy Konsýldyq qatynastar týraly Vena konventsiiasyna, sonymen qatar, Qazaqstan Respýblikasy Qylmystyq-protsessýaldyq kodeksiniń 135-babyna jáne Shet memleketterdiń diplomatiialyq ókildikterin nemese konsýldyq mekemelerin sheteldikterdiń ustalýy jáne kúzetpen ustalýy jóninde habarlaý týraly qaǵidasyna sáikes iske asyryldy", - dep habarlady vedomstvo baspasóz qyzmetiniń jetekshisi Ánýar Jainaqov.
"2018 jyly 17 aqpanda Qyrǵyzstan SIM mekenjaiyna Qazaqstan Respýblikasy Syrtqy ister ministrliginiń jaýap notasy joldandy, onda Qyrǵyzstan Respýblikasynyń azamaty Asylbekuly Damirbektiń ustalǵany týraly málimet bar", - dedi ol.
"Qazaqstan SIM qyzmetkerleri qyrǵyz elshiligimen únemi bailanysta jáne olarǵa Qazaqstan Respýblikasynyń quqyq qorǵaý orgadarymen bailanysyp otyrýyna qolǵabys etip otyr", - dedi QR SIM baspasóz hatshysy.
Aita keteiik, Ulttyq qaýipsizdik komiteti jáne Sybailas jemqorlyqqa qarsy kúres ulttyq biýrosynyń qyzmetkerleri kedenmańy salasyndaǵy quqyq buzýshylyqtyń jolyn kesý, sondai-aq uiymdasqan qylmystyq toptarǵa qarsy kúresti kúsheitý jáne elimizdiń shekarasynda kontrabandalyq áreketterdi joiý úshin Almaty, Jambyl, Ońtústik Qazaqstan oblystarynda jáne Almaty qalasynda iri masshtabty arnaiy operatsiialar júrgizdi, 29 adam ustalǵan, olardyń ekeýi Qyrǵyzstannyń azamaty. Keiin olardyń bireýi kórshi memlekettiń depýtaty ekeni anyqtaldy.
Eske sala keteiik, 16 aqpanda Qyrǵyzstan SIM kórshi eldiń territoriiasynda Joǵarǵy Keńestiń (Qyrǵyzstan parlamenti) depýtaty Asylbekuly Damirbektiń ustalýyna bailanysty Qazaqstan elshiligine nota tabys etti. Konsýlǵa bul maǵlumatty rastaý nemese joqqa shyǵarý jónindegi, sonymen qatar, rastalǵan jaǵdaida ustalǵandar týraly málimet berý, bolǵan jaǵdaiǵa qatysty tiisti túsindirý men tolyq aqparatty berý jónindegi Qyrǵyzstan Respýblikasy SIM-niń notasy tapsyrylǵan bolatyn.
