Qazaqstan Premer-Ministriniń orynbasary – Syrtqy ister ministri Muhtar Tileýberdi óńir elderi boiynsha týrne aiasynda Nur-Sultanǵa saparmen kelgen Eýropa odaǵynyń Ortalyq Aziia boiynsha arnaiy ókili Piter Býrianmen kezdesti.
Bul týraly QR Syrtqy ister ministrliginiń baspasóz qyzmeti habarlady.
Suhbat barysynda Qazaqstan men Eýroodaq arasyndaǵy strategiialyq qatynastardy nyǵaitý máselelerin qosa alǵanda, halyqaralyq jáne óńirlik kún tártibiniń keń aýqymdy ózekti máseleleri boiynsha jan-jaqty pikir almasyldy.
Taraptar óńirdiń turaqty damýyna baǵyttalǵan jobalar men baǵdarlamalardy iske asyrýǵa nazar aýdara otyryp, EO-nyń Ortalyq Aziia boiynsha jańa strategiiasy, sondai-aq Qazaqstanmen Keńeitilgen áriptestik jáne yntymaqtastyq týraly kelisim (KÁYK) sheńberindegi yntymaqtastyqty onyń ishinde Eýroodaqtyń «Team Europe» bastamasyn talqylady.
Kelissózderdiń ózekti taqyryby halyqty koronavirýs indetinen vaktsinalaý máselesi boldy. Taraptar Qazaqstan men EO-nyń «vaktsinatsiia pasporttaryn» taný jáne paidalaný perspektivalaryn talqylady.
Atap aitqanda, P.Býrian óziniń «QazVac» vaktsinasyn jasaý Qazaqstannyń ǵylymi-zertteý áleýetin kórsetetinin atap ótti.
M.Tileýberdi eýropalyq diplomatty «Halyq únine qulaq asatyn memleket» tujyrymdamasy aiasynda Prezident Qasym-Jomart Toqaevtyń bastamasymen qolǵa alynǵan saiasi reformalardyń júzege asyrylý barysymen tanystyrdy. Osy turǵyda, EO ókili Qazaqstandaǵy saiasi reformalardyń úshinshi paketiniń implementatsiiasyn oń baǵalady.
Sol kúni P.Býriannyń QR Prezidentiniń Halyqaralyq yntymaqtastyq jónindegi arnaiy ókili Erjan Qazyhanmen kezdesýi ótti. Onyń barysynda taraptar Qazaqstan men búkil Ortalyq Aziiada innovatsiialar men tehnologiialardy jasaýǵa, damytýǵa jáne taratýǵa baǵyttalǵan jańa baǵdarlamalardy iske asyrý máselelerin talqylady. Óz kezeginde E.Qazyhan suhbattasýshynyń nazaryn Qazaqstandaǵy demokratiialyq ózgeristerge jáne KÁYK erejelerin odan ári implementatsiialaý qajettigine aýdardy.
Kezdesý qorytyndysy boiynsha P.Býrianǵa Qazaqstan men EO arasyndaǵy dostyq qarym-qatynastardy damytýǵa kúsh salǵany úshin alǵys aityldy. Memleket basshysynyń Jarlyǵyna sáikes oǵan Eýroodaqtyń Qazaqstanmen jáne Ortalyq Aziiamen yntymaqtastyq jónindegi strategiialyq qujattaryn ázirleýge jáne iske asyrýǵa eleýli úles qosqany úshin II dárejeli «Dostyq» ordeni tabys etildi.
