Memleket basshysy Qasym-Jomart Toqaevtyń Sybailas jemqorlyqqa qarsy is-qimyl jónindegi keńeste sóilegen sózi jariialandy, dep habarlaidy "Ult aqparat".
Prezident sóziniń mátinin Memleket basshysynyń baspasóz hatshysy Berik Ýáli óziniń Facebook paraqshasynda jariialady.
«Meniń Jarlyǵyma sáikes Alik Jatqambaiuly Shpekbaev Sybailas jemqorlyqqa qarsy is-qimyl agenttiginiń tóraǵasy laýazymynan bosatyldy.
Agenttikte onyń basshylyǵymen jemqorlyqpen kúreste aýqymdy jumys atqaryldy.
Osy qurylymnyń qyzmeti aitarlyqtai jańǵyrdy. Jemqorlyqqa qarsy birqatar jobalar men bastamalar qolǵa alyndy. Solardyń qatarynda «ADALDYQ ALANY», «ANTIKOR ORTALYGY», «ADAL BILIM» jáne taǵy basqalary bar.
Alik Jatqambaiulyna osy qyzmettegi tabysty jumysy úshin alǵys aitamyn.
Búgin meniń Jarlyǵyma sáikes Sybailas jemqorlyqqa qarsy is-qimyl agenttiginiń tóraǵasy laýazymyna Marat Muratuly Ahmetjanov taǵaiyndaldy. Memlekettik qyzmettegi tájiribesi mol maman. Ádilet ministrliginde, Bas prokýratýrada basshylyq laýazymdardy atqardy. Kezinde Ekonomikalyq qylmysqa jáne sybailas jemqorlyqqa qarsy kúres agenttiginiń orynbasary boldy. Sondyqtan men ony osy laýazymǵa taǵaiyndaý týraly sheshim qabyldadym.
Jalpy, memlekettiń qaýipsizdigi jáne halyqtyń ál-aýqaty jemqorlyqpen kúreste júzege asyrylatyn júieli ári tiimdi sharalarǵa tikelei bailanysty.
Osyǵan orai, Agenttik aldynda birqatar mańyzdy mindetter tur.
Birinshiden, sybailas jemqorlyqqa qarsy is-qimyldy barlyq deńgeide tiimdi júrgizý úshin keshendi jumys atqarý qajet.
Mundai sharalar qylmystyq qýdalaý áreketimen ǵana shektelmeýi kerek. Ondai tásildiń keri áseri bolady. Memlekettik apparat sheshim qabyldaýdan tartynyp, biýrokratiiaǵa boi aldyrady jáne laýazymdy tulǵalar jeke jaýapkershilik alýdan jaltarady.
Agenttik jumys barysynda jiberiletin qatelikterdi qasaqana jasalǵan qylmystardan ajyrata bilýge tiis. Sondai-aq, kináli adamdy qylmystyń barlyq quramy bolǵan kezde ǵana jaýapqa tartýy qajet.
Ekinshiden, qoǵam ókilderiniń belsene atsalysýy jáne aldyn alý sharalary sybailas jemqorlyqqa qarsy kúrestiń basty quraldaryna ainalýy kerek.
Qazirgi tańda meniń tapsyrmam boiynsha «Qoǵamdyq baqylaý týraly» zań daiyndalyp jatyr.
Bul qujat memlekettik organdardyń qoǵam aldyndaǵy ashyqtyǵy men eseptiligin qamtamasyz etýdi kózdeidi. Sondai-aq, belsendi azamattarǵa quqyqtyq baqylaý quraldaryn beredi. Osy zań jobasynyń áleýetin barynsha paidalanyp, qoǵamdy jemqorlyqpen kúresýge keńinen tartý qajet.
Úshinshiden, qylmystyq jolmen alynǵan múlikti izdestirý jáne tárkileý isine basa mán bergen jón. Muny «follow the money» qaǵidaty deidi.
Qylmystyq jolmen alynǵan dúnie-múlikti tárkileý jónindegi buljymas qaǵidat sybailas jemqorlyqqa qatysty kez kelgen is-áreketten aýlaq bolýǵa yntalandyrýǵa tiis. Bul jumysty Agenttik qarjy monitoringi organdarymen birlesip atqarýy kerek.
Meniń tapsyrmam boiynsha qylmystyq protsestiń úsh býyndy modeli engizilip jatyr. Mundai model aiyptaýshylyq ustanymdy báseńdetip, qylmystyq protseske zańsyz aralasýdy boldyrmaidy.
Agenttikke óz qyzmetin qylmystyq protsestiń úsh býyndy modeline beiimdeýdi tapsyramyn.
Jalpy, halyqaralyq ozyq tájiribeni eskerip, sybailas jemqorlyqqa qarsy bastamalardy engizýdi jalǵastyra bergen jón.
Qoǵam, biznes jáne investorlar sybailas jemqorlyq qysymynan saqtaityn myqty qorǵan bar ekenin sezinýge tiis.
Jańa basshy Agenttik jumysynyń tiimdiligin odan ári arttyra túsedi dep senemin.
Eńbekterińiz jemisti bolsyn!», - delingen Memleket basshysy Qasym-Jomart Toqaevtyń sózinde.
