Búgin Bishkekte memleket basshylarynyń qatysýymen Ujymdyq qaýipsizdik shart uiymy (UQShU) Ujymdyq Qaýipsizdik keńesiniń sessiiasy bastaldy, – dep habarlaidy «Ult aqparat».
Sessiia jumysyna Qazaqstan Prezidenti Qasym-Jomart Toqaev, Qyrǵyzstan Prezidenti Sooronbai Jeenbekov, Resei Prezidenti Vladimir Pýtin, Tájikstan Prezidenti Emomali Rahmon, Belarýs Prezidenti Aleksandr Lýkashenko, Armeniia Premer-Ministri Nikol Pashinian qatysyp jatyr.
Uiymǵa múshe memleketterdiń basshylary uiym qyzmeti aiasynda ózara is-qimyldyń keń aýqymdy máselelerin talqylaidy. Sonymen birge, biylǵy jylǵy uiym qyzmettiniń basym baǵyttaryn iske asyrýdyń qorytyndysyn shyǵarady dep kútilýde. Sondai-aq, Ujymdyq qaýipsizdik keńesi Jeńistiń 75 jyldyǵyn merekeleý jónindegi is-sharalar josparyn, 2019-2021 jyldarǵa arnalǵan BUU-nyń terrorizmge qarsy jahandyq strategiiasyn iske asyrý jónindegi uiym elderiniń ujymdyq is-qimyl josparyn, tájik-aýǵan shekarasyndaǵy shielenisti azaitýǵa baǵyttalǵan qosymsha sharalar tizbesin bekitýdi josparlap otyr.
Sessiia otyrysynan keiin qortyndy qujattarǵa qol qoiý rásimi ótedi dep kútilýde. Eske sala keteiik, 27 qarasha kúni Bishkekte QR Syrtqy ister jáne qorǵanys ministrleri UQShU elderi keńesiniń birlesken otyrysy ótti.
Ujymdyq Qaýipsizdik Keńesiniń qyzmeti, UQShU organdary rásimderiniń erejeleri, sondai-aq Uiymnyń Bas hatshysyn taǵaiyndaý rásimine bailanysty UQShU quqyqtyq qujattaryna ózgerister engizý týraly máseleler qaraldy.
«Birlesken otyrys syndarly túrde jáne dástúrli dostyq atmosferada ótti. Kelisilgen qujattar 28 qarashada Bishkekte ótetin UQShU memleket basshylary qatysatyn Ujymdyq Qaýipsizdik keńesiniń sessiiasyna túpkilikti qaraýǵa jáne bekitýge shyǵarylatyn bolady», - delingen QR Syrtqy ister ministrligi baspasóz qyzmetiniń málimetinde.
UQShU 2002 jyly qurylǵan jáne quramyna Qazaqstan, Armeniia, Belarýs, Qyrǵyzstan, Resei jáne Tájikstan kiretin halyqaralyq aimaqtyq uiym bolyp sanalady.
