Nursultan Nazarbaev Qostanai oblysynyń ákimi Arhimed Muhambetovti qabyldady, dep habarlaidy "Ult aqparat" Aqordaǵa silteme jasap.
Kezdesý barysynda Memleket basshysyna óńirdiń áleýmettik-ekonomikalyq damý barysy, sondai-aq Joldaýda berilgen tapsyrmalardyń oryndalý nátijeleri týraly baiandaldy.
Elbasy memlekettik jáne salalyq baǵdarlamalardy ýaqtyly ári sapaly iske asyrýdyń, sondai-aq halyqtyń ál-aýqatyn odan ári arttyrý úshin sharalar qabyldaýdyń mańyzdy ekenin atap ótti.
– Qostanai oblysynyń makroekonomikalyq kórsetkishteriniń ósý qarqyny saqtalyp otyr. 2017 jylmen salystyrǵanda ónerkásip óndirisi 8,3 paiyzǵa, qurylys salasy 22,3 paiyzǵa ósip, 300 myń sharshy metrge jýyq turǵyn úi paidalanýǵa berildi, – dedi A.Muhambetov.
Sonymen qatar, Qostanai oblysynyń ákimi Qazaqstan Prezidentine avtomobil óndirisin damytý, investitsiia tartý jáne indýstriialyq jobalardy iske asyrý jumystarynyń nátijeleri týraly málimdedi.
– Oblysta indýstriialyq aimaq qurylýda. Sonyń aiasynda 11 joba ázirlenip jatyr. Sonyń ishindegi eń irisi – aýyl sharýashylyǵy habyn qurý. Onyń quramyna 600 myń tonnalyq qýaty bar arnaiy maqsattaǵy un óndiretin, jylyna 1 million tonna jem daiyndaityn, gliýten óndiretin jáne maily daqyldardy qaita óńdeitin tsehtar kiredi. Bul joba aýyl sharýashylyǵyndaǵy ónimdilikti arttyrýǵa baǵyttalǵan, – dedi A.Muhambetov.
Qostanai oblysynyń ákimi aýyl sharýashylyǵy tehnikasyn óndirý, qurylys materialdaryn shyǵarý, Arqalyq qalasyndaǵy et óńdeý keshenin damytý salalaryna qatysty jobalardy júzege asyrý, sondai-aq shaǵyn jáne orta kásipkerlikti qoldaý sharalary jóninde aitty.
Kezdesý sońynda Nursultan Nazarbaev birqatar naqty tapsyrma berdi.
.jpeg)