Memleket basshysy Nursultan Nazarbaev Túrki keńesin zaman talabyna sai beiimdep, uiym qyzmetin jetildirýdi usyndy, dep habarlaidy QazAqparat tilshisi.
«Búgingi tańda hatshylyqtyń mandaty tehnikalyq jáne hattamalyq suraqtarmen shektelgen. Oǵan qosa, túrki yntymaqtastyq institýttarynyń qyzmetinde qosarlanýshylyq jii kezdesedi. Osyǵan orai, uiymnyń tiimdiligin, fýnktsionaldyq ikemdiligin jáne institýttardyń áleýetin kúsheitý maqsatynda Túrki akademiiasyn, Túrki mádeni «Miras» qoryn, sondai-aq, aqsaqaldar keńesin TÚRKSOI-men (Túrki mádenieti men ónerin damytý halyqaralyq uiymy - avt.) biriktirý kerek. Barlyǵy TÚRKSOI-dyń aiasynda jumys istesin. Bizge kóp sheneýniktiń qajeti joq», - dedi N.Nazarbaev Túrki tildes elderi yntymaqtastyq keńesiniń VI sammitinde.
Prezident Túrki keńesine kiretin taǵy bir uiym - Túrki elderiniń Parlamentaralyq Assambleiasyn (TúrkPA) qysqartýdy usyndy. Sebebi atalǵan institýt óz mindetin atqardy.
«Qazirgi kezde onyń qyzmetinde júielilik baiqalmaidy. Sondyqtan uiymnyń jumysyn saraptaý qajet. Tiimdi bolsa, onda onyń fýnktsiialaryn hatshylyqqa berýge bolady. Eger tiimsiz bolsa, onda ony tolyǵymen qysqartýdy usynamyn. Bul sharalar keńestiń jumysyn tiimdi ońtailandyrýǵa, qyzmetkerler sanyn qysqartýǵa, sondai-aq, qarajatty únemdeýge múmkindik beredi», - dep atap kórsetti N.Nazarbaev.
Memleket basshynyń aitýynsha, uiymnyń negizi organy – prezidentterdiń kezdesýi. Al osy kezdesýde qabyldanǵan sheshimderdi hatshylyq iske asyrady. Hatshylyq óz kezeginde tek ákimshilik jumystarmen shektelmei, uiymnyń intellektýaldy ózegine ainalýy tiis.
«Osylaisha, bizdiń uiym birin-biri tolyqtyratyn eki deńgeiden turady. Ol - Hatshylyq jáne mádeni-gýmanitarlyq salamen ainalysatyn institýt (TÚRKSOI – avt.). Osy oraida uiym hatshylyǵy barlyq taraptarmen birlese otyryp, búkil bastamalar men usynystardy muqiiat pysyqtap, Túrki keńesiniń zaman talabyna sai jańǵyrtý baǵdarlamasyn usynýy qajet. Árine, bul máseleni talqylaý qajet. Búgin áriptester kelisetin bolsa, qysqasha sheshim qabyldaýǵa bolar edi. Al hatshylyq kelesi keńeske deiin bárin talqylap, bizge usynys engize alady», - dedi N.Nazarbaev.
