QR Prezidenti Qasym-Jomart Toqaev ózi bilim alǵan Máskeý memlekettik halyqaralyq qatynastar institýty týraly pikir bildirdi, dep habarlaidy "Ult aqparat".
«Mir» telearnasyna bergen suhbatynda Prezidentke atalǵan oqý ornyna 75 jyl tolǵany týraly aitylyp, Memleket basshysynyń stýdenttik ómiri týraly suraq qoiyldy.
«Máskeý memlekettik halyqaralyq qatynastar institýty (MMHQI) - shynynda da biregei oqý orny. Ol Reseide ǵana emes, kóptegen postkeńestik elderde, sonyń ishinde Qazaqstanda da tanymal. Batys ta bul institýttan habardar, sebebi onyń túlekteri Birikken Ulttar Uiymy men ózge de halyqaralyq uiymdarda jumys istep júr. Onyń rektory, akademik Anatolii Torkýnovtyń kúsh-jigerimen bul JOO stýdentterdiń kostiým men galstýkte júrýi syndy dástúrli jáne konservativti qaǵidalaryn ustanýdy úilestire aldy. Biraq munyń bári artta qaldy, qazirgi stýdentter galstýk taqpaityn da shyǵar. Biz oqyǵan jyldary galstýkpen júrý mindetti edi», - dep eske aldy Qasym-Jomart Toqaev.
Sonymen birge, Prezident 2017 jyly MMHQI túlekteriniń kezekti forýmyn Qazaqstan astanasynda ótkizýdi uiymdastyrýǵa kómekteskenin aitty.
«Sol kezde bizge institýttyń túlekteri - tanymal saiasi, qoǵam qairatkerleri, diplomattar kelgen edi. Sondyqtan mundai forýmdardy ótkizý óte mańyzdy. Meniń bilýimshe, forým ótkizý dástúri áli de jalǵasyn tabady jáne men de bul dástúrdi qoldaimyn», - dedi Prezident.
