Otandyq BAQ ókilderine suxbat bergen QR Prezidenti Nursultan Nazarbaev Ózbekstanmen aradaǵy qarym-qatynasqa toqtaldy, dep xabarlaidy "Ult aqparat".
"Ózbekter - bizge óte jaqyn aǵaiyn. Abai babamyz: "mal sońynda júre bermei, ózbekten jermen jumys isteýdi úirenińder" dep ketken bizge. Olar - úlken kórshimiz. Ortalyq Aziiadaǵy eń úlken memleket, xalyq jaǵynan, ekonomika jaǵynan. Sondyqtan Qazaqstan úshin ol elmen bailanysty nyǵaitý - óte tiimdi, paidaly hám qajet", - dedi Memleket basshysy.
Prezidenttiń aitýynsha, Qazaqstan men Ózbekstan ekijaqty saýda ainalymyn 5 mlrd dollarǵa jetkizýdi kózdeidi.
"Ózderińiz jaqsy bilesizder, Qostanaida birlesip avtomobil shyǵaryp jatyrmyz. Tashkentke poezd júretin boldy. Ushaqtar ushatyn boldy. Buryn anaý jerden, mynaý jerden ainalyp júrdik qoi. Onyń barlyǵy ashyldy. Sondyqtan eki aradaǵy saýda-sattyq ulǵaiyp keledi", - dep atap kórsetti N.Nazarbaev.
Aita keteiik, óz suxbatynda Memleket basshysy biýdjet aqshasy bankterge ne úshin berilip jatqanyn da túsindirdi. Óz sózinde Memleket basshysy BTA bankin eske aldy. Budan bólek, Nursultan Nazarbaev qaltaly azamattardy oralmandarǵa kómek berýge úndedi. Prezidenttiń oiynsha, úlken qalalarda elektromobilderdi kóptep júrgizý kerek. Suxbat kezinde Memleket basshysy "Astana" qarjy ortalyǵynyń paidasyn qarapaiym tilde túsindirdi.
