Búgin Memleket basshysy Nursultan Nazarbaev Quryq portyndaǵy kólik habyn tanystyrýǵa arnalǵan shara aiasynda uiymdastyrylǵan telekópir kezinde «Beineý-Aqjigit-Ózbekstan shekarasy» jolynyń birinshi kezeńin ashýǵa ruqsat berdi, dep habarlaidy QazAqparat.
Atap aitqanda, telekópir barysynda Quryq porty men «Aqjigit - Beineý» respýblikalyq avtojolynyń qurylysshylary jáne «Qorǵas - Shyǵys qaqpasy» Arnaiy Ekonomikalyq Aimaqtaǵy qurǵaq porttyń jumyskerleri bailanysqa shyqty.
«Nurly jol» baǵdarlamasyn júzege asyrý aiasynda «Beineý-Aqjigit» avtojolyn qaita salý jumystary júrip jatyr. Bul jol Quryq porty arqyly tranzitti arttyryp, transkaspiilik dálizdiń Ózbekstanmen jáne Ortalyq Aziianyń basqa da elderimen bailanysyn qamtamasyz etedi. Joldyń ótkizý múmkindigi táýligine qazirgi 1 myńnan 7 myń kólikke deiin jetkiziledi. Sonymen qatar, Qazaqstan-Ózbekstan shekarasyndaǵy «Tajen» shekara beketin jańǵyrtý jumystary júrip jatyr. Ondaǵy ótkizý múmkindigi eki ese joǵarylaidy. «Beineý-Aqjigit-Ózbekstan shekarasy» jolynyń birinshi kezeńi iske qosylýǵa daiyn. Qozǵalysty bastaýǵa ruqsat suraimyz», - dedi «QazAvtoJol» ulttyq kompaniiasynyń basshysy Ermek Qizatov.
Óz kezeginde Memleket basshysy atalǵan jol ýchaskesinde qozǵalysty ashýǵa ruqsat berdi.
«Ózbekstan Prezidenti Shavkat Mirzieevtiń suraýymen jol qurylysy tezdetilip jatyr. Bul jol Ózbekstandy Qazaqstanmen qosyp, atalǵan eldiń júgin Kaspiige alyp kelýge jáne bizdiń porttardyń jumysyn jandandyrýǵa úlken yqpalyn tigizedi. Sondyqtan, atqarǵan jumystaryńyz úshin zor rizashylyǵymdy bildiremin», - dedi QR Prezidenti.
