Memleket basshysy Qasym-Jomart Toqaev videokonferentsiia rejiminde ótip jatqan Shanhai Yntymaqtastyq uiymyna múshe memleketter basshylary keńesiniń otyrysyna qatysýda, dep habarlaidy "Ult aqparat".
«Shanhai Yntymaqtastyq uiymy óziniń qajettiligi men ómirsheńdigin dáleldei otyryp, shtatty rejimde jumysyn jalǵastyryp keledi. Biz búgin bekitýdi kózdep otyrǵan qujattar paketi – sonyń jarqyn dáleli. Bul qujattardyń bári de Shanhai Yntymaqtastyq Uiymynyń abyroiyn bekemdei túsýi jolynda jumys atqaratynyna senimdimin», - dedi Qasym-Jomart Toqaev.
Qazaqstan Prezidenti sońǵy 20 jylda ShYU-ǵa múshe memleketter úlken joldan ótkenin atap ótti.
«ShYU – eń tabysty halyqaralyq uiymdardyń birine ainaldy. Bul uiym jer jahannyń tórtten bir bóligin alyp jatqan aýmaqta senim men seriktestikti nyǵaita biletin tiimdi qural retinde qaralady. Bul yntymaqtastyqqa múshe memleketterde álem halqynyń 40 paiyzy turady, álemdik JIÓ-niń 40 paiyzy – osy uiymǵa múshe memleketterge tiesili. Sonymen qatar ShYU jaýapty aimaqtaǵy jaǵdai óte kúrdeli bolyp otyr, ári ol tereń transformatsiiadan ótýde. Koronavirýs álemdik qaýymdastyqtar úshin qatań synaq bola otyryp, halyqaralyq yntymaqtastyqtyń kemshin tustaryn kórsetip berdi. Pandemiia jahandyq derjavalardyń arasyndaǵy senim daǵdarysyn kúrdelendirip jiberdi. Aldyn alý diplomatiiasy men qaqtyǵystardy retteýdiń qazirgi mehanizmderi aitarlyqtai irkilip qaldy. Qaýipsizdik máseleleri boiynsha qater artyp barady. Onyń ishinde terrorizm, qarýlaný básekesi, ártúrli gibridti soǵystar, klimattyń ózgerýi bar», - dedi Qasym-Jomart Toqaev.
