Syrttan tartylatyn kollektorlardyń qyzmetterin asyra paidalanýǵa jol bermeý tetikterin qarastyrýdy tapsyramyn. Bul týraly Almatyda qarjy sektorynyń ókilderimen kezdesken Prezident Qasym-Jomart Toqaev aitty, dep habarlaidy QazAqparat.
Kezdesý barysynda Memleket basshysy boryshkerlerge qatysty qarjy naryǵyndaǵy ókilderdiń shekten shyǵý áreketterine toqtaldy.
«Nesie mekemeleriniń basshylaryna ishki rásimderdi kúsheitý máselesin pysyqtaýdy, sondai-aq jekelegen qyzmetkerler men syrttan tartylatyn kollektorlardyń qyzmetterin asyra paidalanýǵa jol bermeý tetikterin qarastyrýdy tapsyramyn», – dedi Qasym-Jomart Toqaev.
Sondai-aq Prezident shaǵyn jáne orta biznesti nesieleý, onyń ishinde aýyldardaǵy kásipkerlik bastamalardy damytý elimizdiń qarjy sektorynyń basty basymdyǵy bolýy kerek dep esepteidi. Memleket basshysynyń aitýynsha, turaqty jáne arzan qor jasaý kózderiniń joqtyǵy mikroqarjylandyrý naryǵyndaǵy negizgi máseleniń biri.
«Mundai uiymdardyń qyzmeti ekinshi deńgeili bankterden alynatyn qaryz ben jeke qarajat esebinen qarjylandyrylady. Nátijesinde tutynýshylar úshin nesielerdiń quny joǵary bolady. Sondyqtan Úkimetke Agenttikpen birlesip, mikroqarjy uiymdarynyń qoljetimdi ári uzaq merzimdi qarjylandyrý tetikterin pysyqtaýdy tapsyramyn», – dedi Qasym-Jomart Toqaev.
