Memleket basshysy Ekologiia, geologiia jáne tabiǵi resýrstar ministri Maǵzum Myrzaǵalievti qabyldady, dep habarlaidy Aqorda.
Qazaqstan Prezidentine ministrliktiń qazirgi jumystary, sondai-aq, jańa Ekologiialyq kodekstiń ázirlený barysy týraly málimet berildi. Ministr geologiia salasyn damytý, sý resýrstaryn únemdeý, ormandardy jáne janýarlar álemin qorǵaý úshin qabyldanǵan sharalar jóninde esep berdi.
Memleket basshysy qatty turmystyq qaldyqtarǵa qatysty máselelerdi sheshý, sonyń ishinde synaq alańdaryn ekologiialyq jáne sanitarlyq talaptarǵa sáikestendirý, sondai-aq, qatty turmystyq qaldyqtardy shyǵarý jáne qaita óńdeý salasynyń investitsiialyq tartymdylyǵyn kúsheitý qajettigin aitty.
Qasym-Jomart Toqaev sý jáne ósimdik álemin qorǵaý, brakonerlikpen jáne ormandy zańsyz otaýmen kúres júrgizý máseleleri airyqsha baqylaýda bolýy tiis ekenine toqtaldy.
Sonymen qatar, Qazaqstan Prezidenti halyqtyń ekologiialyq mádeniettiligin arttyrýǵa jáne qorshaǵan ortany qorǵaý jumystaryna eriktilerdi tartýǵa shaqyrdy.
